Bandièra01 1180x150: Comuna de Tolosa

Actualitats

La Glèisa Catolica a causit lo renovelament amb un jesuista argentin, lo papa Francés

Lo papa Francés
Lo papa Francés
Lo cardinal Jorge Mario Bergoglio, qu’a causit lo nom de Francés, es estat elegit nòu papa pels 115 cardinals electors. S’agís d’un cardinal argentin: es lo primièr papa non europèu (sens comptar Sant Pèire e qualques autres papas a l’Edat Antica). Es tanben lo primièr papa jesuista de l’istòria de la Glèisa Catolica. Lo fum blanc del tech de la Capèla Sixtina avisèt ièr, a 19h06, que s’èra ja elegit lo successor del papa Beneset XVI. Lo segond jorn de conclau, e après cinc vòtes, decidiguèron que seriá el lo nòu evesque de Roma. L’anonci generèt un esclatament de jòia dins la Plaça Sant Pèire del Vatican. Bergoglio ven lo 266n pontife de la Glèisa Catolica dins un temps de fòrta crisi e de dificultats.
 
L’eleccion de Bergoglio en sonque dos jorns de conclau es un còp dur a l’aparelh e l’oficialisme del Vatican. Que los cardinals ajan elegit un jesuista indica tanben la volontat de renovelament. Vist coma un cardinal moderat e progressista dins un contèxt fòrça conservator, es tanben per las reformas dins la Glèisa. Lo nòu papa, pasmens, èra pas demest los que se cresiá qu’avián mai de probabilitats d’èsser elegits e, de fach, èra a pena pres en compte. Se ditz a prepaus dels conclaus que “lo que i intra papa, ne sortís cardinal”, e aqueste còp s’es passat aital. Ça que la, lo nòu evesque de Roma a 76 ans e dins lo conclau precedent demandèt als cardinals electors que votèsson pas per el, çò que favoriguèt lo cardinal Ratzinger, ara papa emerit Beneset XVI.
 
Francés sortiguèt ièr al balcon de la Plaça Sant Pèire, abilhat de blanc e amb una crotz fòrça simpla sul pitre, per donar l’orason “Urbi et Orbi” e demandèt als fidèls de pregar per el. “Los cardinals son anats quèrre lo papa gaireben al cap del Mond, mas sèm aicí”, çò diguèt. Après demandèt de pregar pel papa emerit Beneset XVI. Anoncièt que uèi anariá pregar la Verge Maria per que velhèsse sus Roma. Bergoglio sollicitèt lo fidèls crestians per far camin amb el, un “camin d’amor, frairesa e fisança entre nosautres”, e acabèt lo discors amb l’indulgéncia plenièra e una orason en lo silenci de tota la plaça.
 
 
Son ròtle pendent la dictatura argentina, possible ponch negre
 
Lo sit web d’un jornal progressista argentin, Página 12, s’es saturat qualques minutas après que se saupèsse lo nom del nòu papa, Jorge Mario Bergoglio. Página 12 es lo jornal qu’acusa, dempuèi longtemps, Bergoglio d’aver collaborat amb la dictatura de son país (que durèt de 1976 a 1983). Segon lo jornal, lo nòu papa agiguèt contra de prèires e de laïcs capturats pendent lo regim, que fòrça d’eles foguèron torturats o desapareguèron.
 
 
Lo primièr papa jesuista
 
Bergoglio es lo primièr papa jesuista de l’istòria de la Glèisa Catolica. Filh d’un matrimòni d’italians, foguèt proclamat cardinal prèire de San Roberto Belarmino lo 21 de febrièr de 2001 e foguèt president de la Conferéncia Episcopala Argentina pendent dos periòdes.
 
A 21 ans, prenguèt la decision de venir prèire. Foguèt nomenat ja dins l’òrdre jesuista lo 13 de decembre de 1969. Faguèt, a partir d’alavetz, una longa carrièra que se vegèt pas copada per la dictatura argentina. Lo 20 de mai de 1992, foguèt consagrat evesque titular d’Auca per exercir coma un dels quatre evesques auxiliars de Buenos Aires.
 
En junh de 1997, foguèt designat evesque coadjutor a l’archevescat de Buenos Aires e prenguèt la carga d’archevesque de Buenos Aires lo 28 de febrièr de 1998. Lo 21 de febrièr de 2001, Joan Pau II lo faguèt cardinal.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
6.

Monsehor Romero recebiá dins sa catedrala de San José de personas secutadas per la distadura. Aital los aparava, valent a dire que lor salvava la vida. El meteis èra menaçat de mòrt. Se sabiá. Sens cercar a far de miracles, lo Papa -que non l'evesque- Joan Pau II auriá pogut prononciar qualquas paraulas per frenar los assassins, que se sap que, dins aqueles países, los que mandan los assassins, son atentius a çò que ditz Roma. Mas la vida de l'evesque de San José del Salvador valiá pas d'escomenjar los caïds que manejavan lo país. E lo Papa Joan Pau faguèt coma son predecessor Pius XII per los josius: diguèt pas res.

  • 2
  • 0
BOURDON Pau
5.

#4 "Quí a oblidat que calguèt una peticion gròssa per marcar en occitan (bigordan) la frasa de Bernadeta Sobirós sobre la cauna del miraculós apariment de la Verja Maria ?" Quasi tot lo monde, pensi. Totun, aqueth ahar que pròva qu'en se mobilizant, qu'ei possible d'obligar un poder a renonciar a traficar l'istòria nosta. Açò que vau entà la Glèisa, que vau tanben entà l'Estat. Qu'ac disi en responsa a las planhenças exprimidas dens los comentaris de l'editoriau sus l'istòria. Filadèlfa ne s'acontentè pas de bramar, qu'agí, tanben, e que podó au mensh cambiar aquò.

  • 0
  • 0
Jacme Tolosa
4.

Renovelament ? Soi pas plan segur d'aiçò ... lo sistèma ecclesial vaticanesc es fait de tala manièra per non se renovelar jamai, per la seuna ideologia basica.
Avèm oblidat l'inquisicion qu'avèm suportat en Occitània ; e la suportèm encara, l'afar de la bibliotèca del Collègi d'Occitània n'es la pròba, ajudada per un sistèma ierarquic josuïta e un peire 'occitanista' segon lo CAOC, e mantunas autras associacions d'Occitània ...
Quí a oblidat que calguèt una peticion gròssa per marcar en occitan (bigordan) la frasa de Bernadeta Sobirós sobre la cauna del miraculós apariment de la Verja Maria ? mas quí a oblidat que foguèt exilhada en país francés, e sobretot francofòne, de Nevers ? Quí ?
Non i a res d'esperar de Roma, nimai de l'ecclesià vaticanesc. RES. Compreni perfaitament los que vòlon pus botar los pès dins una glèisa catolica, l'istòria del castig d'Occitània debuta per la glèisa catolica ; la causa es diferenta per Bretanha, Euskadi, Catalonha, Savòia, Alsàcia, Flandras ; mas per Occitània suportèm grandament la repression catolica, encara e encara.

  • 4
  • 1
PESSAMESSA Pèire sivergues Vauclusa
3.

ai oblidat de signalar que lo papa novèu estènt ,jesuita que l'ordre fondat per Ignacio de loloya à Montmartre avià establit a la fin dau sègle XVII au Paraguay e dins lo nord de l'Argentina una teocracia egalitària qu'a durat un pau mens d'un sègleque podèm comparar a l'Iran d'Aminhejad qu'èra esmougut ais oussequis de son amic Chavez e que en signe de compassion a sarrat la maire dau commandante contra sa peitrina, ço que li a vaugut de croiticas vëementas dins son pais. a 50 quilometres de Cordoba, se pot visisar un d'aquel establiment jesuita, encara pron ben conservat que fai doncas,partida dei monuments pus ancians de la Republica Argentina que son gaire espès

  • 6
  • 2
PESSAMESSA Pèire sivergues Vauclusa
2.

m'agradarià que Pirolet m'expliquèsse ço que significa de reprochar a un papa de laissar assassinar un evesque, coma se l'aguèsse pogut empachar. rapelarai que lo paure Chavez èra un catolic fervoros, que Telesur a l'anoncia de l'eleccion de Francesc 1° faguèt una emession especiala digna de Radio Vatican e que lo novèu papa es estat encensat coma Chavez, sensa relambi, e ara fai dètz jorns que dura ! aier, quand entendèri lo papa elegit faire son discors, me diguèri, té, an votat per un italian, mai èra pas lo cas, èra argentin e l'emigracion italiana a abord influençat l'espahnol en Argentina e a l' Uruguay, que lo parlan ambe un accent italian (babi, disèm en provença), d'aqui ma confusion. me pensi que tampauc serà pas un papa anti-catalan que ailà la comunautat catalana es forta e puissanta, lo casal catala de Buenos-Aires es un edifici majestuos coma un palais, en mai d'aquo, ma nora es argentina,mai s'ei maridada civilament e vai pas à la gleisa, mai aquo interessa degun

  • 7
  • 2

Escriu un comentari sus aqueste article