Bandièra01 1180x150: Comuna de Tolosa

Actualitats

Rugbi de XIII: los angleses demòran solets fàcia als oceanians

Lo capitani Benjamin Garcia e los Blaus pòdon pas res fàcia als samoans: desfaita 4-62
Lo capitani Benjamin Garcia e los Blaus pòdon pas res fàcia als samoans: desfaita 4-62 | Icon Sport

Tèxte legit

Lo tresen torn de las partidas de la Copa del Mond de XIII a confirmat las diferéncias de nivèl entre las formacions qualificadas pels quarts de finala e las autras uèit participantas: Anglatèrra frega los 100 punts fàcia a Grècia: 94-4; Fiji bat Escòcia: 30-14 e Austràlia ganha 66-6 fàcia a Italia; la Nòva Zelanda passa 48-10 a Irlanda e Liban domina Jamaica 74-12. Tònga es sens pietat per las illas Cook: 92-10.
 
E França rescontrava aqueste dimenge sus la pelena de Warrington Samoa; lèu, se vegèt la diferéncia entre las formacions. La densitat fisica e la velocitat d’execucion èran del costat dels jogaires del Pacific que trapèron lèu de solucions en fasent córrer la palma: 28-0 a la pausa e 62-4 al final: 11 ensages e 9 transformacions contra l’ensag marcat per Fouad Yaha.
 
Los quarts de finala prepausaràn las oposicions:
 
— divendres: Austràlia-Liban
 
— dissabte: Anglatèrra-Papoa e Nòva Zelanda-Fiji (revenge del quart de 2017 ganhat per Fiji: 4-2)
 
— dimenge: Tònga-Samoa.
 
Los angleses demòran los sols europèus fàcia a las formacions del Pacific, dins la mesura ont la formacion libanesa es compausada d’australians de familhas originàrias del país de l’Orient Mejan.
 
 
Debuta de las autras 2 competicions mondialas
 
Aqueste dimars 1r de novembre, la partida entre Anglatèrra e Brasil dobrirà la Copa del Mond femenina. Las francesas rescontraràn las neozelandesas dimècres a 6 oras, las australianas dimenge (20h30) e las jogairas de las illas Cook dijòus 10 de novembre.
 
Pel XIII-cadieral, la debuta de la competicion intervendrà aqueste dijòus 3 amb las partidas Espanha-Irlanda e Anglatèrra-Austràlia. Los franceses jogaràn contra los galeses (divendres 4, a miègjorn), fàcia als escoceses diluns 7 e contra los estatsunidencs, dijòus 10.
 
 
Elèit 1: victòrias audencas e catalanas
 
Una quatrena jornada de campionat d’Elèit 1 de las resultas gaire susprenentas amb las victòrias dels tres clubs audencs e de las doas formacions catalanas.
 
La formacion dels Orses de St Gaudenç presenta un tot autre visatge que las annadas passadas ont se trigossava en fons de classament. L’esquipa de Carcassona deguèt enauçar son nivèl de jòc per faire la diferéncia e comptar sus las qualitats de correire de son dobertura Clamenç Herrero que marquèt dos ensages en partissent dels 20 mètres locals. Victòria carcassonesa: 38-14.
 
Los Dragonets signan lor primièra victòria de la sason fàcia als Leupards de Vilanòva: 42-20.
 
En desplaçament a Tolosa, Lesinhan ganha mercé a una penalitat fàcia als pals dins las darrièras minutas: 30-28.
 
Lo cap de fila Limós domina una pallinèla formacion d’Avinhon: 46-14. A Pià, Alan Baby marca dos ensages, los transforma e ajusta doas penalitats: lo jogaire marca totes los punts pels catalans que baton Albi: 16-12.
 
Al programa de la cinquena jornada: Albi-Limós e Lesinhan-Pià se jogaràn dissabte. Carcassona reçauprà los Dragonets dimenge. Lo dèrbi St Gaudenç-Tolosa e Avinhon-Vilanòva son tanben al programa.
 
 
 
 
Alan Roch
 
 

 
 abonar los amics de Jornalet

 


 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article