Bandièra01 1180x150: Comuna de Tolosa

Actualitats

Chipre ven lo primièr “corralito” europèu

L’Eurogrop acòrda un “salvament” de 10 miliards d’èuros per l’illa, amb la participacion de l’FMI

Los ministres de l’Economia de la Zòna Èuro signèron un acòrdi, dissabte de matin, per ofrir a Chipre una ajuda financièra de fins a 10 miliards d’èuros, per tal de contribuir a resòlver los sieus problèmas de deute; o confirmèt lo president de l’Eurogrop e ministre de las Finanças neerlandés, Jeroen Dijsselbloem. Es una chifra fòrça mai bassa que la dels autres salvaments de l’Union Europèa e del Fons Monetari Internacional (FMI) destinats a Grècia, Portugal e Irlanda, en mai del salvament bancari espanhòl. Los ministres an clavat l’acòrdi après mai de dètz oras de negociacions a la sedença del Conselh de l’UE a Brussèlas, ont èra tanben lo president de Chipre, Nikos Anastasiadis.
 
Dijsselbloem a confirmat que lo còst del salvament s’estima a un maxim de 10 miliards e qu’entre las condicions acordadas, i a aquela d’introdusir una taxa de 6,75% suls depauses en banca de fins a 100 000 èuros, e de 9,9% suls depauses en dessús d’aquela soma: es una mesura amb la quala Nicosia espèra de recuperar 5,8 miliards d’èuros. De mai, s’aumentarà de 10% a 12,5% la taxa sus las societats.
 
Amb la taxa suls depauses en dejós de 100 000 èuros, se trenca lo gatge que l’UE acordèt per aquel tipe de comptes, mas Dijsselbloem a justificat lo besonh d’un programa especific per afrontar una “situacion especiala”.
 
E mai se Chipre es un país petit, los ministres de l’Economia de la Zòna Èuro s’amassèron d’urgéncia per resòlver la siá situacion en tement una possibla contagion a la rèsta dels estats. Chipre s’es vista fòrça afectada per la siá dependéncia al sistèma bancari grèc, e es la sedença de fòrça entrepresas de capital rus. Lo país es vist amb malfisança per l’Union Europèa, que li exigís mai de transparéncia e de mesuras contra lo blanquiment de capital.
 
Sus la participacion del Fons Monetari Internacional (FMI) a l’operacion, Dijsselbloem a dich que seriá desirable. E la directritz gerenta d’aquela institucion internacionala, Christine Lagarde, a confirmat que recomandarà la participacion en lo rescat, e mai s’a dich que la chifra de la siá contribucion se deu encara determinar.
 
Lo programa se basa sus un ensems de “mesuras ambiciosas” que vòlon “garentir l’estabilitat del sector financièr”; e tanben, vòlon “determinar las accions per complir l’ajustament fiscal requerit amb de reformas estructuralas, per fin de sosténer la competitivitat e la creissença equilibrada e sostenabla”, segon lo comunicat difondut per l’Eurogrop.
 
“L’assisténcia financièra a Chipre es garentida per salvagardar l’estabilitat financièra de l’illa e de la Zòna Èuro dins lo lor ensems”, çò apondèt Dijsselbloem en la conferéncia de premsa.
 
Del sieu costat, lo membre del comitat executiu de la Banca Centrala Europèa (BCE), Jörg Asmussen, a anonciat que las mesuras exigidas a Nicosia comencèron de se tractar la dimenjada passada per que la taxa intrèsse en vigor dissabte passat e, tanben, perque aqueste diluns es jorn de fèsta a Chipre.
 
Aquela mesura poiriá generar un risc de fugida de capitals dimars, quand dobriràn las bancas de l’illa (diluns es fèsta en Grècia e Chipre), e per aquò, las autoritats an impausat un “corralito” fins que la novèla taxa siá aprovada. De fach, de centenats de personas an pas capitat de retirar lo lor argent de las bancas, qu’aplican ja la nòva taxa e an blocat totes los servicis electronics.
 
La chifra de 10 miliards d’èuros representa una revision a la baissa del salvament inicial de 17 miliards d’èuros que sollicitèt Nicosia; e s’espèra qu’amb aquela ajuda s’arribe de redusir lo deute del país de 150% a 100% en 2020, qu’es çò que demanda l’FMI.
 
L’Eurogrop espèra que s’apròve formalament lo salvament pendent “la segonda mitat d’abril de 2013” e que se someta a la ratificacion de las proceduras nacionalas, çò que lo comissari dels Afars Economics e Monetaris, Olli Rehn, a demandat que se passe dins un temps rasonable, per evitar mai de retards.
 
Dins lo comunicat final, l’Eurogrop espèra tanben un acòrdi de Chipre amb Russia, sus una “contribucion financièra” d’aquel darrièr país.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

manjacostel mureth
2.

ne sem al moment ont la mafia a pas mai besonh de s'amagar per panar lo paure monde....
La pratica fisa son argent a la banca.
La banca prèstan aquel argent a l'Estat , mas i a la mafia internacionala que prèsta tanben aquel l'argent a l'Estat, que lo trapa merces dels investiments de la banca mondialisada, que cercan de rendaments a dos chifres dins la sang e la susor del terç monde. Mondialisacion....
Mas un jorn qualqu'un s'espauruga , la Mafia via G Sach sona l'alarma, pus lèu que los autres prestaires , e l'Estat pòt pas pagar lo deute . lo FMI, l'OMC , braman de compas que la mafia vòl son argent, n'a lo drech!.
Alara le paure govèrn dels braves elegits del pòble que sian d'esquèrre o de drecha:
-aumentan las talhas, espetan la politica de la santat de l'escòla, de l'universitat, estripan las retiradas, vendon las entreprèsas publicas, mentre que los medias del monde liure explican que podon pas far quicòm d'autre... .O los masòs dison que l'an plan cercat aquels formics grècs...
Fin finala quora i a pas cap de vergonha, i van francament a la bona franqueta , fan coma a Chipre un hold-up e cabussan las mans directament dins las caissas e las pòchas de la pratica . Revertan alara, çò que son, un tropèl de pòrcs qu'aurian capitar d'espetar la cleda de l'òrt ...

  • 3
  • 0
Batko
1.

Ei curiós que los grans mèdias parlan d'aquò mès pas jamei de çò qui hascoc Islanda, ei a díser non pas pagar lo deute e hicar uns banquèrs en preson ...
En lenga capitalista, la "crisi" vòu díser "aument de l'injustícia sociau".
Lo moneda s'ei pas esparvolada sus Març.

  • 4
  • 1

Escriu un comentari sus aqueste article