Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaLanas e LabritMarsan

Lo Pishotèr malaudiós, un malaut en grana forma

Teatre en occitan en Gasconha: los Comelodians de Saut de Navalhas jògan tanben dens las Lanas. Adara, qu’an au programa ua navèra adaptacion gascona tirada de Molière.


En noveme de 2021, la valenta tropa deus Comelodians de Saut de Navalhas tornèt sus l’empont per la prumèira d’ua navèra pèça a la lor mòda, Lo Pishotèr malaudiós. Adaptacion gascona deu Malaut imaginari (jo tanben qu’arreviri...) deu gran Molière, la pèça —escriuta per la Marie-Jo Hustaix—Etcheverry dab l’ajuda de l’empontaire Alan Muñoz per la mesa en scèna – qu’a hèit s’esclacassar lo public dissabte 12 de noveme a Sent Pèir deu Mont, comuna tanhenta deu Mont de Marsan. Après tres representacions (a Saut de Navalhas, a Salias de Bearn e a Lescar au primtemps passat), los comedians amators avèn donc un rendetz-vos dens las Lanas on son dejà vienuts mei d’un còp. Aquera representacion qu’èra perpausada per l’ACPL (Associacion per la Cultura Populara dens las Lanas) dens l’encastre deu son petit hestenau aperat l’Autonada.
 
Shens enqüera s’aperar los Comelodians, los passionats de teatre gascon, au torn de Fernand Dauguet, comencèren de jogar en 1978 peçòtas d’un aute ahuecat de “bearnés”, Hubert Lux. Puish, qu’estó L’Alemanda, de Gilabèrt Narioo, jogada peu permèir còp en 1986 a Sent Pè de Leren. Puish, las autas creacions s’encadenèren, sovent adaptacions en òc d’òbras celèbras (Aristofanes, Shakespeare, Molière, Beaumarchais, Obaldia) per la comediana-escrivana Marie-Jo Hustaix-Etcheverry.
 
Agradiva estót donc la representacion, dissabte passat, preu public deu Mont e de quauques autes parçans lanusquets. Conhit de dolors sus son cadierau garnit de coishins per solatjar espatlas, còth, arrea, jolhs o calhivar, Jean-Luc Despouys èra un malaut ...en grana forma. A maugrat de la caguèira qui’u miava prèstament dens la colissa, que pishotejava quan èra question deu maridatge dab Silvèra (X. Lequertier) de la soa Floreta (Betty Deyres), sa hilha que sa mairastra Docina (Aline Carrère) avè en hasti. Mes, bien segur, que calè comptar dab lo realisme de la petulanta goja Celestina (Thérèse Higue) e deu hrair deu “gran malaut”, Ipolit (Yves Bédoura),  cap aus mètges e apoticaris de la familha Diafoirus, sabentassa e interessada (Adeline Bies, Nicolas Marriat). E per assegurar las transicions enter las hèitas, Ouvrard, comic tropièr, èra de la revista dab los sons maus qui, a la coda-l’i-sega, lo mian a consultar lo “major” deu regiment: meussa, hitge, budèths, pilòr... Shens oblidar “lo paumon”!
 
 
 
 
Joan-Jacmes Fénié
 
 
 
 
Foto JJF:
Clistèr en man, la tropa deus Comelodians
abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article