Los burèus de Twitter a San Francisco (Estats Units) son barrats dempuèi aqueste divendres après que de centenas de salariats an decidit de quitar la societat. Lo novèl proprietari del ret social, Elon Musk, demandèt als salariats d’efectuar mai d’oras de trabalh en menaçant de licenciar los qu’o acceptarián pas, e mai prepausèt tres meses de salari als que voldrián quitar lor emplec sul pic. Tot aquò a menat a de demissions massissas dels emplegats.
 
Ara los burèus de Twitter son barrats per paur que los qualques salariats que i demòran “pòscan sabotar lo ret social”. Dins aquel sens, la societat a mandat los emplegats a l’ostal fins a diluns venent.
 
D’autre caire, Twitter a blocat l’accès als espleches de comunicacion intèrna e als dispositius qu’èran entre las mans dels emplegats.
 
Ara qualques èx-emplegats asseguran que la societat a pas pro d’engenhaires per far foncionar los sistèmas critics del ret social, de sòrta que se poiriá blocar a quin moment que siá.