Tèxte legit
Las partidas se pòdon destriar en 3 categorias:
— una esquipa es plan mai fòrta que l’autra e lo rescontre es de sens unic.
— las esquipas son de meteis nivèl, lo rescontre es equilibrat e se sap pas fins a la còrna (e, de còps, fins al punt en aur) qual vencerà.
— l’esquipa la mens fòrta gèta sas fòrças dins la batèsta per susprene l’adversari, mas ten còp mièja orada o lo primièr temps, puèi lo mai fòrt se passeja.
Costat equilibrat, i aguèt la partida en país tarnés ont Albi perven a dominar Avinhon: 22-12 e demòra mèstre a l’ostal.
Costat de la victòria aisida, dissabte, Lesinhan se repren aprèp la brava desfaita a Limós e bat 40-18 una esquipa de Vilanòva qu’a totjorn pas ganhat una partida dempuèi la debuta de la sason. Dimenge, Limós mestreja la partida de cap en cima a St Gaudenç: 48-10.
Sus la tresena opcion, s’es tenguda la partida entre las resèrvas dels campionats angleses. A Tolosa, los locals se trapèron menats de 16 punts pels Dragonets, mas se lancèron dins una operacion “remontada” per ganhar: 38-28.
A Carcassona, los locals menan 18-13 a la pausa e fan la diferéncia dins lo segond temps: 46-23.
En cap d’aficha de la primièra dimenjada de decembre: lo dèrbi, luta per la primièra plaça, e revenge de la finala passada entre Limós e Carcassona que se tendrà dimenge a l’Agulha. Dissabte, la partida Avinhon-Lesinhan serà retransmesa en dirècte per ViàOccitanie. Figuran tanben al programa de la jornada: Dragonets-Albi, Pià-Tolosa e Vilanòva-St Gaudenç.
Superliga: preparacion de la sason novèla
Las esquipas de Superliga dintran dins lo temps de preparacion de la sason novèla que començarà a la mitat de febrièr. Se fan los darrièrs ajustaments d’efectius.
Los Dragons Catalans fan signar un jogaire polivalent de las linhas arrièr en provenença dels Roosters: Adam Keighran. Lor agradariá plan de rompre lo contracte del pilar Dylan Napa, mas per ara degun ne vòl pas! Josh Drinkwater jonh Dudson e Kasiano a Warrington. L’an que ven, amb la dobertura d’una linha aeriana entre Perpinhan e Leeds, los desplaçaments deurián èsser mai simples pels jogaires e los sostens, mas solament l’estiu (del 1r de junh al 30 de setembre).
Intensificacion del calendièr internacional
Los angleses an anonciat que los Cavalièrs (la seleccion dels mens de 23 ans) prendrián part a la Copa d’Euròpa de 2023. Los Cangorós parlan de faire una virada en Euròpa en 2024.
Alan Roch
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari