Bandièra01 capçalera  1180x150: Novestivada

Actualitats

crotz-tolosaCreated with Sketch.GasconhaVal d'Aran

Nèish eth projècte Araina entà possar qu’es naues tecnologies parlen e entenguen er aranés

Eth 17 de deseme, aurà lòc en Vielha eth prumèr maraton de votzes entà enregistrar votzes de parlants der aranés

Era tòca deth projècte Araina ei de crear un còrpus de votz en occitan aranés, indispensable entà desvolopar tecnologies deth parlar.


Actuaument non ei possible qu’es maquines parlen o comprenguen er occitan. Entà qu’açò sigue possible s’a de besonh ua basa de donades damb centenats d’enregistraments de votzes en aranés. 
 
Entà meter-i remèdi, era cooperativa Col·lectivaT especializada en tecnologies entà lengües minorizades, met en marcha eth projècte Araina, votzes en aranés entà promòir era creacion deth prumèr còrpus de votz en occitan d’Aran a partir dera participacion collectiva. 
 
Era tòca deth projècte Araina ei contribuir ara suberviuença der aranés per mejan dera creacion d’un còrpus de parlar en aguesta varietat occitana. Eth reconeishement automatic de votz ei un compausant de besonh en desvolopament d’assistents basadi en intelligéncia artificiau e a de besonh centenats d’ores de donades de parlar de fòrça persones parlantes dera lengua. Aguest ei un prètzhèt plan costós autanplan entà idiòmes damb ressorses elevades. 
 
 
Maraton de votzes en Vielha: de cap a un còrpus de parlar en aranés possat pera comunitat
 
Entà començar a recuélher ores de votz en aranés, s’a organizat eth prumèr maraton de votzes entà enregistrar era votz de persones de parlar aranés de diuèrses edats, registres e parlars. Er eveniment se celebrarà eth 17 de deseme ena sala Antara der ajuntament de Vielha e Mijaran (Carrèr Arnals, 7) de 10 a 14h, e amassarà as prumères persones volontàries que siguen disposades a dar era sua votz. Tanben i aurà era opcion de participar-i de forma virtuau pendent tota era dimenjada.
 
Es persones volontàries auràn de liéger diuèrsi fragments de tèxtes projectats sus ua pantalha mentre s’enregistren. Es tèxtes introdusidi entà hèr er exercici son des òbres literàries classiques tradusides ar aranés per Antòni Nogués. Tot aguest procès es realize a trauès dera plataforma dubèrta Common Voice de Mozilla coma se hè damb eth projècte Aina que ja a mès de 2500 ores de votzes amassades en catalan.
 
Conferéncia de premsa de presentacion deth projècte Araina, votzes en aranés
 
Entà dar a conéisher eth projècte Araina e eth sòn camp de trabalh, es harà ua conferéncia de premsa damb es persones responsables deth projècte.
 
Dia e ora: 17 de deseme tàs 11.30h
Lòc: Conselh Generau d’Aran (Passeg dera Libertat, 16, Vielha)
 
 
Henerècla tecnologica e desvolopament de tecnologies deth parlar
 
En cas des lengües majoritàries, eth procès de generacion des prototipes e eth desvolopament des tecnologies deth parlar ei relativament simple mercés ara existéncia des servicis balhadi pes enterpreses tecnologiques. Per contra, ei malaisit de trobar solucions entàs lengües minorizades coma er occitan. Aguesta ei ua des conseqüéncies dera henerècla tecnologica entre es lengües damb ressorses sufisentes e es lengües damb mens ressorses, causa qu’agrèuge encara mès eth perilh d’escandilhament digitau d’aguestes darrères.
 
 
Sus eth projècte Araina e Col·lectivaT
 
Eth projècte Araina ei possat pera cooperativa Col·lectivaT damb era collaboracion des cercaires dera Universitat de Lhèida Jordi Suïls Subirà e Helena Torres Purroy, membres deth Conselh Consultatiu der Aranés. Ei subvencionat peth departament de cultura dera Generalitat de Catalonha en encastre des “Subvencions entà promòir eth coneishement e er emplec der occitan, aranés en Aran, en Catalonha”, e recep eth supòrt deth Conselh Generau d’Aran, deth Congrès Permanent dera Lengua Occitana e dera fondacion Mozilla.
 
Col·lectivaT ei ua cooperativa sense tòca lucrativa que promò era coneishença dubèrta e eth dialòg entre diferentes realitats, mejançant era recèrca sociau e era prestacion de servicis lingüistics e tecnologics. Laguens d’aguest darrèr encastre, un des sòns prètzhèts centraus ei eth desvolopament de tecnologies innovadores ath servici de lengües minorizades. En aguest sens, an desvolopat eth prumèr sintetizador de votz basat en hilats neuronaus en catalan, eth Catotron, e collaboren tostemp entara numerizacion de lengües coma er amazigh, eth judeoespanhòl e eth galhèc.





Col·lectivaT

 


abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ferriòl Barcelona
2.

#1 Tostemp parièr. Far far e far. T'o desfan. E tornarmai far, far e far...
Aürosament n'avèm coma tu que fan, fan e fan...

  • 4
  • 0
Quentin Tolosa
1.

Teni de veire Common Voice coma un fracàs personal. Aviái escrich en 2018 e 2020 a prepaus d'aquesta iniciativa mas jamai capitèri de formar un gropon per contribuir coma cal.
Soi content pel monde d'Aran, encara qu'aquò age implicat que nòstres dos aprèp-miègjorns de traduccion del site de Common Voice foguèsson partits amb l'aiga del banh.

Los articles :
Collectages e assistent vocal : https://opinion.jornalet.com/lo-quentin/blog/2677/collectages-e-assistent-vocal
Common Voice : etapa 1/3 : https://opinion.jornalet.com/lo-quentin/blog/3073/common-voice-etapa-13

  • 5
  • 0

Escriu un comentari sus aqueste article