Bandièra01 capçalera  1180x150: Novestivada

Actualitats

Alemanha: an arrestat 25 ultradrechistas que planificavan d’assautar amb d’armas lo parlament

Lo ministèri public alemand a detalhat dins un comunicat que los detenguts son “de presumits membres e seguidors d’una organizacion terrorista”

Tèxte legit

La polícia alemanda a arrestat 25 membres d’un grop ultradrechista acusats de planificar un còp d’estat, en utilizant d'armas contra de representants estatals al parlament per formar apuèi lor pròpri govèrn.
 
Lo ministèri public alemand a detalhat dins un comunicat que los detenguts son “de presumits membres e seguidors d’una organizacion terrorista” e a confirmat que i a d'operacions en marcha per deténer un total de 52 personas. A dich que 22 dels detenguts son de membres del grop e son totes de ciutadanatge alemand, del temps que los autres tres son dos alemands e un rus.
 
Las arrestacions an agut luòc dins los estats federats de Bada-Wurtemberg, Bavièra, Berlin, Èssa, la Bassa Saxònia, Saxònia e Turíngia, del temps que doas personas son estadas detengudas en Àustria e Itàlia, respectivament. A aquò s’apondon de raflas e perquisicions dins 130 proprietats de quatre autres estats federats d’Alemanha.
 
“Los membres de l’associacion son conscients que lor projècte pòt solament ben capitar per de mejans militars e violents contra de representants estatals, compreses d'omicidis. Los acusats son units per un prigond refús de las institucions estatalas e de l’òrdre democratic liure en Alemanha”, çò a indicat lo ministèri public, qu’a dich que totes eles “seguisson un mescladís de mites conspiratius de las ideologias Reichsbürger e QAnon”.
 
 


abonar los amics de Jornalet

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article