Quicòm es de mal comprene: alara que lo XIII es un espòrt d’esséncia divenca, dins la mesura ont Crist e 12 apòstols, aquò fa una brava esquipa de 13 sus pè, òm se pòt demandar perqué aqueles moments d’apròchi de la fèsta de Nadal pòrtan aquel nom bravament antinomic de Fèsta de l’Endavant! Benlèu, coma lo freg arriba, los jogaires an mai de dificultat per mestrejar las palmas? Se qualqu’un pòt demandar e obténer lor avís a Sant Gaudenç o a Sant Estève, sèm preneires de l’explica.
 
 
Elèit1: lo roge es pas solament per l’Òme Nadal!
 
Aquesta dimenjada, se clavava la fasa anar del campionat d’Elèit 1.
 
Dissabte de vèspre, a Sant Estève, l’ora èra al dèrbi catalan entre los joves Dragonets e una formacion pianenca fòrta de totes sos refòrts venguts dels Dragons. Lo primièr temps foguèt equilibrat e se clavèt sus una egalitat a 10 pertot. A la represa, Pià marca d’entrada aprèp una 40/20. Amendrits per un carton roge, los Dragonets van plegar botiga e s’inclinar 36-16.
 
Los cartons roges van tanben aver un ròtle de primièra dins la partida entre Lesinhan e Albi. Dissabte al Molin, una temperatura que vesinava 0° menèt los jogaires a se rescalfar fòra las règlas del jòc. Amb un carton roge just sus la còrna e un segond tre la represa, Albi joguèt lo segond temps a onze. Los Tigres ensagèron de s’acrocar fàcia a una esquipa qu’arpategèt son jòc. Los tarneses capitèron pas de dintrar dins lo bònus defensiu e perdèron 26-10.
 
Dimenge, resulta sens surpresa per l’afrontament entre los primièrs, Carcassona, e los darrièrs, Vilanòva. Larga victòria dels audencs: 56-8 qu’acaban aquesta fasa anar a la primièra plaça del classament.
 
Limós se va impausar a Tolosa: 42-18. A St Gaudenç, Avinhon fa jòc egal dins lo primièr temps, abans d’acccelerar e d’empòrtar 30-18 una partida importanta en vista de la qualificacion. 
 
Abans la pausa nadalenca, se jogarà la primièra jornada de las partidas venir. Al programa: Avinhon-Carcassona, Dragonets-Lesinhan, Pià-Limós, St Gaudenç-Albi e un Tolosa-Vilanòva entre doas formacions que se son pas encara rescontradas, vist que l’afrontament reportat de la primièra jornada s’es pas encara jogat.
 
 
Superliga: la sason novèla se prepara
 
Los internacionals franceses an représ l’entraïnament amb los Dragons Catalans. Lo club a romput d’un acòrdi comun lo contracte amb lo pilar Dylan Napa. Lo tres-quarts centre Samisoni Langi muda en Anglatèrra per jogar a Wakefield ont ven de signar per doas sasons.
 
A la demanda dels clubs de Superliga, la sason venenta la comission de disciplina demesirà lo nombre de partidas d’exclusion e aumentarà lo còst de las emendas. Los clubs explican: l’abséncia penaliza las formacions. Son los jogaires que pagan las emendas: aquò los deuriá incitar a mesurar los gèstes!
 
 
 
 
Alan Roch