Bandièra01 capçalera  1180x150: Novestivada

Actualitats

Qatargate e lo ret de corrupcion UE-Marròc

L'èx-eurodeputada Ana Gomes assegura qu’ara compren las resolucions frustradas al Parlament Europèu sul Sahara Occidental

L’escàndol de corrupcion Qatargate s’espandís. De documents que los an publicats qualques mèdias mòstran un ret de corrupcion euromarroquin. Segon aquelas informacions, lo regim wahhabitah assoudèt d’eurodeputats per que defendèsson lors interèsses politics al Parlament Europèu. Aquelas sospièchas se refortisson après la confession de Francesco Giorgi, calinhaire de l’èx-vicepresidenta de l’eurocambra Eva Kailí, segon la quala es implicat dins un ret de corrupcion que tòca Marròc e Qatar, çò rapòrtan Le Soir e La Repubblica.
 
L’èx-eurodeputat italian Pier Antonio Panzeri, ja detengut, recebèt d’argent “e de presents” entre 2005 e 2019 de Marròc, segon qualques mèdias italians, alemands e bèlgas. La polícia de Belgica a escorcolhat las residéncias de la familha a Milan e a Calösch, près de Bergam. Los agents i an confiscat de material informatic, de documents e 17 000 èuros en liquid. An verificat tanben los comptes bancaris e los bens de la familha.
 
Segon lo mèdia flamenc De Morgen, los servicis secrets bèlgas seguissián Panzeri dempuèi 2021. Aquel an, los agents perquisicionèron l’abitatge de l’èx-deputat italian perque consideravan que i podiá aver un risc d’ingeréncia estrangièra amb l’implicacion de Panzeri. A comptar d’alavetz, lo ministèri public bèlga ne comencèt l’enquista.
 
Ara tant la femna de Panzeri coma sa filha, totas doas assignadas a domicili, son acusadas de complicitat amb una organizacion criminala, de corrupcion e de blanquiment d’argent. Las autoritats bèlgas ne demandan l’extradicion. Dins las convèrsas qu’a escotat la polícia, la filha e la femna de Panzeri se planhon qu’ongan ajan pas pogut despensar 100 000 èuros pendent las vacanças, coma o faguèron l’an passat. Aquesta setmana, se vòlon evitar l’extradicion devèrs Belgica, auràn de demostrar que los 17 000 èuros trobats dins lor ostal an d’originas legitimas.
 
Segon lo procuraire, èran al corrent de la corrupcion de Panzeri e mai participèron “al transpòrt dels presents” que, segon Le Soir, aurián recebut de l’ambaissador de Marròc en Polonha.
 
Panzeri e Giorgi foguèron en contacte amb lo servici marroquin d’intelligéncia exteriora, la Direccion Generala d’Estudis e de Documentacion (DGED) e amb l’ambaissador de Marròc en Polonha, segon Le Soir e La Repubblica. E lors informacions indican que son implicats tanben dos agents del marroquin servici d’intelligéncia.
 
L’èx-eurodeputada portuguesa del grop socialista, Ana Gomes, a romput lo silenci sus l’implicacion de Marròc dins lo Qatargate e a escrich sus Twitter: “Gilles Pargneaux es lo lobbista mai descarat de Marròc qu’aja conegut al Parlament Europèu. Coma eurodeputat, se presentava sovent coma «Conseiller de Sa Majesté le Roi». Avián pas jamai enquistat sus el? Doncas aurián degut enquistar sus el.”
 
A mai, Gomes diguèt: “Es pas solament Qatar. Marròc auriá finançat tanben Antonio Panzeri e d’amics sieus dempuèi longtemps. Se vei fòrça clarament dins las resolucions frustradas al Parlament Europèu sul Sahara Occidental e los dreches umans en Marròc. Pòdi pas comptar las batèstas qu’aguèrem sus aqueles subjèctes…”.
 
abonar los amics de Jornalet
 
 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Farda Lorda.
3.

Air France, Lufthansa e Las autras companias europencas van aver lo piels que se recercelon jos l’aflat de Qatar Airways que bufa dins l’esquina.

L’Union Europenca es a signar un accòrd de cèl dierp ambe Qatar. A l’espera dempuèi 2019, s’es ratificat alandarà las pòrtas del cèl europenc a Qatar Airways.

En mai d’aquò poirà far de vòls cargo dentre Europa e Estats-Unids. Brussèlas ça demandèc contrapartidas sul respièg de las reglas de concurencia e del dret del trabalh…….

  • 1
  • 0
Farda Lorda.
2.

Ambe la creauguda de sa capacitat de produccion de gas natural liquefiat (GNL), l’emirat pòt jogar sus l’espaci grand daissat par l’atancamant de las importacions de gas rus en europa per ensatjar d’impausar son albir a brusselas e als vint e set.

Alamanha que li cal trobar 150 Milhards de m3 de gas aviá signat dos accòrds per renforçar son acandolament de GNL venent de l’emirat per una pontada de 15 ans.

Coma cadun o sap es Alamanha que capdela Europa , tanben Europa levat qualques querdadas e bracejadas farà pas plan causas.

  • 0
  • 0
Farda Lorda.
1.

De las encusas de corruptèla lo Qatar amenaça l’UE d’un efeit negatiu sus la seguretat energetica mondiala.

De qual es que nos presta d’argent suls mercats ?

França e son deute de 2 956,8 Milhards d’euros representat per 113% del PIB quicharà pas ont dòl de segur e un còp mai s’anirà alastrar.

Avèm de resquinlaires de tria òc

https://www.lemonde.fr/international/article/2022/12/19/doha-previent-l-union-europeenne-de-l-effet-negatif-de-sa-reponse-au-qatargate_6154989_3210.html

  • 2
  • 0

Escriu un comentari sus aqueste article