Bandièra01 capçalera  1180x150: Botiga

Actualitats

Escandalós interrogatòri per l’OFPRA d’una demandaira d’asil

France 3 a consultat l’enregistrament de l’entreten de demanda d’asil d’una femna que fugissiá l’esclavatge impausat per un marit poligam e que patiguèt un accident cerebral mentre qu’èra en Libia

| Maxppp

Tèxte legit

France 3 publiquèt divendres passat l’enregistrament d’un entreten de demanda d’asil vertadièrament escandalós: 50 minutas de questions insistentas e cochosas e, enfin, asil rebutat. S’agís d’una femna de 28 ans que fugissiá un maridatge forçat en condicions d’esclavatge impausadas per son mari poligam en Cameron e que dins son odissèa patiguèt un accident vascular en Libia. Lo 2 de mai passat, quitèt Niça, ont residís, per èsser entenduda a l’Ofici Francés de Proteccion dels Refugiats e Apatridas (OFPRA).
 
Lo primièr quart d’ora de l’entreten amb l’agent de l’Ofpra es consagrat al trajècte migratòri de la femna. Quitèt Cameron, jonguèt la Còsta d’Evòri e puèi remontèt cap a Nigèr e enfin Libia, ont demorèt pendent tres ans.
 
Puèi arriba l’examen de las rasons de la demanda d’asil depausada per Rose, que conta aver "fugit un maridatge forçat" mas qu’a pena pòt formular una frasa completa; compren pas totjorn las questions e respond sovent fòra del subjècte. A causa de l’accident vascular cerebral que lo patiguèt en 2019 en Libia a de trebolaments de la paraula, e ne poguèt pas èsser tractada abans d’arribar a Niça en decembre de 2020.
 
La fragilitat especiala d’aquela femna es totun precisada dins son formulari d’asil, mas sembla que l’agent de l’OFPRA i faga pas cas. Sospira, se carcanha e tusta quitament amb lo ponh sus la taula. Après mièja òra d’entreten, aquò se tremuda en un interrogatòri dins lo qual l’emplegat pèrd completament paciéncia: crida, quita pas d’interrompre la femna quand aquesta ensaja de parlar, quitament quand rapòrta las violéncias conjugalas fisicas e sexualas infligidas per son marit al qual escapèt. Aquel moment de l’interrogatòri es vertadièrament dur per ela e per quina persona sensibla que l’escote...
 
De fach, l’avocata de Rose, Pauline Soubié-Ninet, denóncia la "violéncia institucionala" subida, segon ela, per sa clienta pendent aquel entreten a l’OFPRA. Soubié-Ninet insistís sus "lo trajècte traumatic" de Rose, que conta èsser estada reducha "en esclavatge" per un òme "poligam" que n’èra "la quatrena esposa".
 
"Aquel entreten es contrari a la dignitat umana e al respècte dels autres, que son de pèiras angularas de nòstre estat de drech e que devon guidar las accions de las personas que lo representan", çò conclutz. Ara a sasit la Cort Nacionala del Drech d’Asil per far tornar examinar la demanda de la refugiada.
 
Contactat per France 3, lo director general de l’OFPRA, Julien Boucher, estima que l’ofici es "particularament atentiu a la bona presa en compte de la vulnerabilitat dels demandaires d’asil e a plan desvolopat son expertesa en la matèria". Totun, admet que "i pòt aver de mancaments a aquelas bonas practicas."
 
Dins lo raconte fach per Rose a la Fondacion de Niça, que l’albèrga dempuèi son arribada, la femna declara: "França se trachèt de ieu quand aviái pas pus l’espèr de viure. Fins a uèi, l’espital se tracha de ieu. Mos mots son blocats, es tròp fòrt al nivèl de las emocions. Parli melhor qu’abans. M’exprimissi melhor qu’abans."
 
Son recors deuriá èsser examinat dins los meses venents.
 
 
 
abonar los amics de Jornalet

 


 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Emmanuèl Isopet
3.

#1 "lo dejos de l'imigracion es pas totjorn tant clar qu'aquò"... coma disia l'autre de Pezenàs "comprend qui veut ou comprend qui peut". Çò segur es que lo dejos de l'anti-imigracion es pas jamai net e cande. Ni lo dessus tanpauc me diretz.
Paure monde. Urosament, d'unes ciutadans son eissits d'aujòls 100% locals, o qu'en tot cas se migrèron foguèt solament per de bonas rasons e amb lo bon biais, eles.

  • 14
  • 0
Far de chifra, tot es aqui !
2.

#1 Tè, mon brave Lachaud, tas perpensacions prigondas sul real e la realitat me rementan aqueles que tot còp nos afortissan sentenciosament " òm a dich un molon de causas suls camps de concentracion, e ben, sabètz, es sovent fòrça exagerat". Qu'aprèp tot "avian d'òrdres" e pecaire "lor calia far de chifra", e, me damne, fasian pas que son trabalh. E òc, coma aquel brave fonccionari de l'OFPRA !

  • 11
  • 1
pierre lachaud
1.

Fau ben justifiar l'imigracion emben daus exemples que son mediatisas a l'extrem. La paubretat nurit las messonjas.
Dija pas que quò es pas vrai mas lo dejos de l'imigracion es pas totjorn tant clar qu'aquò. L'òm tarda a far lo procès de Nicolas Sarkozy que s'es permetut de bombardar la Libia!

  • 1
  • 15

Escriu un comentari sus aqueste article