Bandièra01 1180x150: Comuna de Tolosa

Actualitats

Chastèlmanh: polemica pel sabotatge de l’illuminacion de l’arbre de Nadal

La polemica creada en julhet passat entre los abitants e d’astrofils per l’illuminacion del santuari de Sant Manh es tornada amb l’avet

| Chastelmanh - Castelmagno - Paìs Occitan

Tèxte legit

La polemica amodada entre los abitants e d’astrofils en julhet passat per l’illuminacion del Santuari de Sant Manh a Chastèlmanh (Val Grana) es tornada ara amb l’illuminacion de l’arbre de Nadal. Tornarmai los afeccionats d’astronomia se planhon de la pollucion luminosa mentre que los abitants vòlon los lums, çò rapòrta Targatocn.
 
L’avet de Nadal foguèt alestit gràcias a de fonzes collectats per la populacion e las entrepresas localas. Es alucat de 17h a 23h e de 5h a 7h30 fins al 6 de genièr. Mas dissabte passat, 17 de decembre, los abitants del masatge d’En Claps remarquèron qu’avián amortat los lums de l’arbre. Quand anèron veire çò que se passava, comencèt una batèsta dialectica qu’arribèt a d’insolentariás.
 
Los estatjants e lo cònsol màger an demandat que s’identifique los sabotaires del temps que l’Associacion dels Astrofils de Bisalta s’es distanciada de l’eveniment e assegura que cap de membre de son grop es pas estat implicat. Lo fach es, totun, que dempuèi que lo santuari de Sant Manh a représ vida, los passionats d’astronomia que vesitan l’endrech son emmaliciats.
 
Dins l’estiu passat, lo nòu rector del santuari e lo gerent de l’aubèrja decidiguèron de donar una nòva vida al sit per tal de reviudar l’activitat e la zòna que, segon los abitants, veniá de conéisser una mena d’abandon. Per tant, après n’informar la populacion, placèron de fars per illuminar lo santuari los dissabtes de ser de 21h a 23h. L’idèa foguèt fòrça ben aculhida pels estatjants, mas los astrofils planguèron la decision fins al ponch d’arribar tanben als insultes.

 
 
 



abonar los amics de Jornalet

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
1.

La pollucion luminosa es un problèma gròs mas es l'abans darrièra ròda del carri (abans la pollucion sonòra). Illuminar l'avet per Nadal es una causa ; ara, botar de fars tota l'annada, nani monsur !
Ieu tanben m'agrada d'agachar lo cèl la nuèch mas i a tròp de lums qu'empachan de veires las estelas.
Empachar de veire las estelas es encara una amputacion de çò que nos fa umans.

  • 11
  • 0

Escriu un comentari sus aqueste article