Bandièra01 1180x150: Comuna de Tolosa

Actualitats

Lo Parlament de Chipre vòl pas far pagar una partida del salvament als estalviaires

Lo partit del govèrn s’abstenguèt dins lo vòte de dimars passat. Lo president Anastasiadis tornèt negociar ièr amb los autres partits. Las bancas seràn barradas fins a dimars que ven e la glèisa ortodòxa chipriòta ofrís las siás possessions per salvar lo país.


Lo Parlament de Chipre refusèt dimars passat de far pagar una partida del rescat als estalviaires en impausant una quitança als depauses bancaris de mai de 20 000 èuros. Los quites deputats conservators del president Nikos Anastasiadis volguèron pas votar en favor. Los centristas, sòcis de govèrn, e tota l’oposicion votèron contra, en blòc. Lo ministre de las Finanças, Mikhalis Sarris, neguèt d’aver presentada sa demission. Anastasiadis tornèt negociar ièr amb los autres partits. Lo resultat del primièr vòte, a man levada, foguèt de 36 vòtes contra e 19 abstencions.
 
E mai se l’Eurogrop li demandèt diluns que toquèsse pas los depauses inferiors a 100 000 èuros, protegits per la legislacion europèa, fin finala Anastasiadis vòl pas que protegir los petits estalviaires qu’ajan mens de 20 000 èuros dins lors comptes, segon la darrièra proposicion. La Comission Europèa li remembra que li cal recobrar 5,8 miliards d’èuros se vòl que Brussèlas pague la siá part, los 10 miliards promeses.
 
Lo president de l’Eurogrop, Jeroen Dijsselbloem, ensagèt de tranquillizar los estalviaires de la rèsta del sud d’Euròpa en insistissent que la quitança dels depauses chipriòtas èra pas extrapolabla als autres païses. “Aquela temor tomba absoludament mal, i a pas cap de besonh d’impausar cap de taxa als actius dels autres païses”, çò assegurèt. Per justificar las pèrdas qu’auràn d’assumir los ciutadans chipriòtas, Dijsselbloem faguèt allusion a la mesura del sector bancari chipriòta, qu’es arribat a pesar 800% del PIB de l’illa.
 
Lo president Anastasiadis convoquèt los caps dels autres grops a una nòva reünion, ièr a 10 oras del matin, amb l’objectiu “d’examinar d’alternativas per afrontar la situacion que se crearà après la session del parlament”. La siá proposicion manten lo puniment de 6,75% pels qu’ajan entre 20 000 e 100 000 èuros. E, contràriament a çò que li demanda l’Eurogrop, enduresís pas la quitança als qu’ajan mai de 100 000 èuros, que se manten a 9,9% en luòc de la far pojar a 12,5%.
 
La Comission Europèa avertiguèt ièr lo govèrn chipriòta que, independentament de la formula qu’empleguèsse, deu recobrar los 5,8 miliards se vòl que Brussèlas e pague los 10 miliards acordats per aquel salvament, qu’es lo cinquen après los de Grècia, Irlanda, Portugal e del sector bancari espanhòl. Lo pòrtavotz dels Afars Economics europèus, Simon O’Connor, remembrèt que los ministres de las Finanças de la Zòna Èuro acceptavan que Chipre apliquèsse un impòst mai progressiu, mas s’a lo meteis impacte financièr. “Aquò es fòrça clar”, çò avertiguèt.
 
Chipre es tanben a cercar l’ajuda de Russia. Moscòu a d’interèsses en assegurar la subrevivença de las bancas en Chipre, ont i a de milards d’èuros de las entrepresas e dels ciutadans russes.
 
Las bancas seràn barradas fins a dimars que ven e la glèisa ortodòxa chipriòta ofrís las siás possessions per salvar lo país.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article