En collaboracion amb Ràdio Occitània, Jornalet prepausa cada dimenge una entrevista àudio del podcast de la ràdio tolosana. Aquesta setmana, escotaretz sus las ondas l’entrevista de Michaël Barret, lexicograf en associacion amb lo Congrès Permanent de la Lenga Occitana; presenta los espleches numerics per la lenga occitana que se’n parlarà lo 1r de febrièr dins lo webinari evocat dins la nòva precedenta.

Quand s’agís de presentar lor boita d’aisinas, lo mond del Congrès Permanent de la Lenga Occitana demòran pas embarrats dins lors locals de la Ciutat a Pau. Anar a l’endavant dels usatgièrs e dels locutors es un prètzfach primordial per aquel mond que vòlon far venir mai accessibla la lenga. D’aquí l’organizacion d’un webinari sus la pagina Twitch de l’ÒPLO lo 1r de febrièr per discutir amb d’ensenhaires de primièr e segond grases de l’utilizacion de las aplicacions del Congrès en classa. Avèm crosat Michaël Barret, lexicograf, de passatge a l’Ostal d’Occitània per una serada de presentacion.