Iran a executat l’èx-viceministre de la defensa Alireza Akbari jos l’acusacion d’espionatge, çò anoncièron las autoritats iranianas dissabte passat. Akbari èra ciutadan britanicoiranian e acusat de trabalhar pel servici d’intelligéncia del Reialme Unit, l’MI6. Foguèt viceministre de la defensa pendent lo mandat de Muhammad Khatami (1997-2005).
 
Segon lo sit Mizan, que publica las informacions judiciàrias de l’estat iranian, “la senténcia s’es aplicada per la carga de corrupcion e d’accion extensiva contra la seguretat intèrna e extèrna del país per mejan de l’espionatge al profièch de l’aparelh d’intelligéncia del govèrn britanic”.
 
Lo primièr ministre britanic s’es mostrat “consternat” e a net e clar condemnat l’execucion. “Es un acte insensible e coard, efectuat per un regim barbar que respècta pas los dreches umans de son pròpri pòble. Mas pensadas van als amics e a la familha d’Alireza”, çò a declarat Rishi Sunak.
 
 
Torturat pendent 3500 oras
 
Las autoritats iranianas avián demandat a la familha de la victima que lo vesitèsson pel darrièr còp en preson dimècres passat, del temps que sa femna soslinhava que l’avián acantonat en solitari, çò rapòrta la BBC que precisa qu’après son arrestacion, lo droguèron e lo torturèron pendent 3500 oras en tot l’obligar de far de confessions falsas dins un vidèo.
 
Amnestia Internacionala a tanben condemnat l’execucion. “Es una nòva esfraiosa que demòstra tornarmai lo respècte dolorosament escàs de las autoritats iranianas pel drech de la vida”, çò a dich una pòrtavotz de l’ONG al Reialme Unit, Freshta Sharif.


 

I am appalled by the execution of British-Iranian citizen Alireza Akbari in Iran.

This was a callous and cowardly act, carried out by a barbaric regime with no respect for the human rights of their own people. My thoughts are with Alireza’s friends and family.

— Rishi Sunak (@RishiSunak) January 14, 2023