La dotzena jornada del campionat d’Elèit 1 de XIII se dobriguèt dissabte a Limós amb l’oposicion entre los primadièrs e los darrièrs. Aprèp un vintenat de minutas de resisténcia dels Leopards, los locals comencèron d’engranjar los punts: 16-0 a la pausa e 54-0 al final amb 10 ensages marcats; l’arrièr Zac Santo anèt per sa part tres còps darrièr la rega.
 
A Sant Estève, los Orses de Sent Gaudenç vendián carament lor pèl, mas perdián: 30-24.
 
Dimenge èra jorn de dèrbi a Domèc: 500 manjaires al dinnar d’avantpartida. Lesinhan èra mai lèu en accion e marcava un ensag per Tomàs Malfaz (que portèt un temps las colors de Carcassona). Lo capitani Alexís Escamillà marcava 3 ensages en un quart d’ora e los Canaris menavan a la pausa 12-6. A la represa, l’arbitre acordava un ensag de penalitat als locals. Los Molinièrs s’empleguèron per ragantar lor retard, mas capitèron pas qu’a marcar un sol còp e daissèron la victòria a Carcassona: 18-10.
 
A Tolosa, Albi menava 14-0 a la pausa; los locals capitèron a prene l’avantatge 16-14 mas finiguèron que pleguèron: 26-20. En tèrra catalana, Pià demorèt mèstre a l’ostal fàcia a Avinhon: 20-10.
 
Arriba una dimenjada de pausa per las formacions d’Elèit 1 per faire plaça a la Copa Lòrd Derby.
 
 
Plaça a la Copa
 
La Copa de França Lòrd Derby es pas anada a son tèrme dempuèi 2019. Aquesta dimenjada, se jogarà las partidas del 4n torn amb l’entrada en competicion de las formacions d’Elèit 2.
 
Sièis partidas son al programa d’aqueste dimenge 22:
   
Lançament de sason pels Dragons
 
Los Dragons an cambiat la data de lor serada de lançament de sason. Inicialament prevista aqueste divendres 20 en serada al Palais dels Congrèsses de Perpinhan, la vesprada es remesa al divendres 27. A Brutus, la comuna ven de desmargar los gradins que correspondián pas mai a las nòrmas de seguretat. Lo club se vira cap a la construccion anonciada de la tribuna novèla per remplaçar aquela pèrda de plaças.

 
 
 
 
Alan Roch