Bandièra01 capçalera  1180x150: Botiga

Actualitats

Rugbi de XIII: Pià e Vilanòva al tablèu d’onor de la 13a jornada

A St Gaudenç, Maika Serulevu marca per Carcassona
A St Gaudenç, Maika Serulevu marca per Carcassona | Astreizix

Tèxte legit

Lo freg a segurament liberat las volontats ofensivas de las formacions d’Elèit 1 dins las 5 partidas que se jogavan aqueste dissabte 28 de genièr.
 
A St Gaudenç, tres ensages signats del segonda-linha fijian Maika Serulevu en fin del primièr temps permetián a Carcassona de faire la diferéncia fàcia als Orses: 24-6.
 
Al Molin, Fabian Flovie signava 3 ensages e Lesinhan coneissiá pas gaire de dificultats per s’impausar als tolosans: 44-16.
 
Pel primièr còp de la sason, los Leopards de Vilanòva coneisson las jòias de la victòria en dispausant dels Dragonets al tèrme d’una partida disputada qu’anèt fins al punt en aur: 22-18.
 
En Avinhon, provençals e lengadocians jògan a “ten tu, ten ieu”! Limós mena 12-6 a la pausa, Avinhon egaliza a 16 pertot, mas los audencs ajustan un ensag transformat e un tombat per ganhar 23-16. Los vauclusencs prenon lo punt de bònus defensiu.
 
A Albi, es l’alièr Francés Theresin que signa tres ensages e los pianencs domdan los Tigres que mancan la transformacion pel punt de bònus: victòria catalana 34-20.
 
 
Los Dragons sus la pelena
 
Primièra aparicion oficiala dels Dragons aqueste dissabte 4 de febrièr a 3 oras e mièja del vèspre dins lor estadi de Brutus per una partida de preparacion contra una seleccion dels jogaires franceses d’Elèit 1.
 
Lo club a balhat los numèros dels malhòts per 32 jogaires, del n°1 Artur Morgue al n°32 Mike Parenti, en passant pel n°13 del capitani Benjamin Garcia. De segur, lo Sam Tomkins pòrta son n°29. Lo n°6 de Tirone May daissa pensar que serà lo dobertura quand serà remés de sa nafradura. Seriá acompanhat a la mesclanha per Mitchell Pearce. Lo n°8 de pilar es balhat a MacMeeken, cridat atal a montar d’un cran per presentar una segonda linha amb Matt Withley (n°11) e Paul Seguièr (n°12). Mas aquò es de teoria, que la sason es plan longa.
 
Lo club anóncia la signatura d’un centre australian que lo nom ne serà revelat la setmana que ven.
 
 
L’endeman de fèsta pel Tolosa Olimpic
 
Lo Tolosa Olimpic entamena sa sason de Championship aqueste dissabte 4 de febrièr de vèspre a Barrow. L’objectiu fixat demòra lo retorn en Superliga. Sus la pelena, serà complicat de contrar una formacion de Featherstone de format Superliga. Per tornar trapar lo mai naut nivèl, lo club occitan poiriá comptar amb las modificacions enfaciadas sus lo foncionament de la Superliga pels dirigents.
 
La sason passada en SuperLiga a costat de moneda: un trauc de 500 000 èuros que ne demòra encara 200 000 de trapar. Cal comptar sus una fugida de plan de jogaires de l’efectiu passat; un president, En Sarrazin, que passa la man; un grop limitat per ara a un vintenat de jogaires; una crida faita als licenciats d’Elèit 1 de montar d’un cran... Lo pilar samoan Harisson Hansen es estat designat coma capitani de la formacion. Ten una polida carta de vesita: mai de 300 partidas de Superliga jogadas, 10 capas internacionalas.
 
Lo club a signat un acòrdi de “dobla licéncia” amb los Dragons Catalans que permet una circulacion dels jogaires entre las doas formacions.

 
 
 
 
Alan Roch
 

 
 
abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article