Bandièra01 1180x150: Comuna de Tolosa

Actualitats

De signaturas en linha per gardar l’Estivada

Demandan que lo festenal siá pas dissociat de la vila que lo vegèt nàisser e créisser, e que demòre rodanés e occitan

Tèxte legit

An lançada una peticion en linha per demandar a la comuna de Rodés de manténer un festenal interregional de la cultura occitana, çò es de gardar l’Estivada. Es una de las accions entamenadas per l’occitanisme per combatre la decision del cònsol màger de Rodés, Christian Teyssèdre, de desoccitanizar l’Estivada que se ten sus sa comuna.
 
La peticion recòrda que, dempuèi 1995, Rodés ven pendent qualques jorns la capitala de la creacion, de la diversitat, de la riquesa e del dinamisme de las lenga e cultura occitanas e de las culturas minorizadas d’endacòm mai. Tanben soslinhan que lo festenal es vesitat cada an per de desenas de milièrs de festenalièrs venguts de pertot, locutors e non locutors d’occitan, militants e non militants, çò que demòstra que la cultura occitana es plan viva e generosa.
 
La peticion ramenta l’importància de la creacion en occitan, ramenta los artistas que fan vibrar tot lo país e ramenta qu’es la fiertat dels roergasses qu’aquel festenal siá viu, perque es prigondament restacat al territòri e als qu’i vivon.
 
Per tant, demandan que l’Estivada siá pas dissociada de la vila que lo vegèt nàisser e créisser, que lo festenal rèsta rodanés e occitan.
 
De remembrar que Teyssèdre a anonciat “un cambiament de cap” per l’Estivada, lo festenal que dempuèi mai de 25 ans èra vengut lo referent de la cultura occitana e que lo gerís la vila dempuèi 2015. Dins aquel sens, lo municipi anóncia qu’ongan organizarà, en partenariat amb France Télévisions, tres jorns de concèrts amb “de caps d’aficha de granda renomenada” luènh de l’Estivada de las darrièras annadas. Es a dire que la desoccitaniza completament jos l’escampa que lo festenal “atira pas vertadièrament las molonadas, e sustot la joventut, afeccionada de musica actuala”, çò rapòrta Centre Presse Aveyron.




Clicatz sus l'imatge per signar




abonar los amics de Jornalet

 



 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Èsser un monsur "vertadièr"
2.

#1 L'alienacion que buta a escafar son accent occitan e a prene corses de diccion parisenca-francimanda, lo Francis Cabrel tanben i a pas escapat. Sufis d'anar veire sus Youtube d'entrevistas de fa 30 o 40 ans e de comparar cossi uèi aquel charra ponchut ( levat quauquas pichonas intonacions miegjornalas discrètas que li son demoradas). Un monsur vertadièr, qu'ara tot ço que ditz fa mai serios, puta, segur que dèu far envièja al "Tisserand" de Rodès e a la Carola Delgà !

  • 11
  • 0
Gerard Cairon Florentin d\'Albigés
1.

Doas nòvas qu'an fugit d'una enquista menada per un jornalista del plan conegut "Rodez last news":
Son estats recuperats dos documents encara non divulgats:
- del ministèri de la Justicia :
Una demanda es en cors venent d'una "personalitat coneguda" que se voldriá far apelar "Tisserand", nom que, sens cambiar res a la significacion iniciala, sonariá melhor que son nom actual, d'origina patesa e vulgara.
Lo dorsier seriá en cors d'examen per veire se dintra dins la categoria dels "..noms difficiles à porter car perçus comme ridicules et pejoratifs..."
- de l'escòla: " Revirada sens retorn" (traduccion aproximativa del nom en francés)
Per los que la coneisson pas e que serián interessats, aquela escòla ajuda en linha o en sessions presencialas, los que patisson per pèrdre un accent que traís lor origina populara, sustot l'accent occitan, qu'un còp adult, es de mal pèrdre e que fa mal anar quand òm se vòl far veire e ausir dins los mitans socials ont òm sòmia de dintrar...
Las resultas d'aquela formacion son mai que bonas, mantunas personalitats del "show biz" l'an seguida e tanben del mond politic, de Cristòf Castaner a Aurelian Pradièr ...e tantes autres...
Per assegurar la credibilitat de l'institut, cal, solide, presentar tanben qualques revèrses....Caròla Delga, ni per se'n èsser donada tant que podiá...a pas encara capitat...e la region li vòl pas mai finançar una novèla annada de formacion...
Justament, la personalitat çai-naut mençonada seriá, pel moment, dins l'espèra d'una presa en carga per la colectivitat que representa, dels fraisses financièrs relatius a n'aquela formacion....

  • 16
  • 0

Escriu un comentari sus aqueste article