Bandièra01 1180x150: País Invisible

Actualitats

Turquia: Erdoğan permetèt de pagar una taxa qu’evitava de complir la lei suls materials de construccion

Dempuèi 2018 se legalizèt 13 milions de bastiments que mancavan a la lei, çò que permetèt a l’estat d’encaissar 4 miliards de dolars

Tèxte legit

La tragedia causada pel tèrratrem en Turquia, Siria e Curdistan compta un nombre de mòrts espaventable. Del caire turc lo nombre de bastissas escrancadas es exagerat e la causa es que lo govèrn turc permetiá, dempuèi 2018, de pagar una taxa qu’evitava de complir la lei suls materials de construccion. Aital, se legalizèt 13 milions de bastiments que mancavan a la lei, çò que permetèt a l’estat d’encaissar 4 miliards de dolars.
 
La lei en question establissiá de nòrmas per far de bastissas mai resistentas après lo tragic tèrratrem de 1999 ont moriguèron 17 000 personas e mai d’un milion perdèron lors ostals. Mas en 2018 se concediguèt una amnestia pels que contravenián a aquela lei se pagavan una taxa.
 
Dimècres, lo president turc, Recep Tayyip Erdoğan, vesitèt una de las zònas afectadas pel tèrratrem en tot far una crida a “l’unitat e la solidaritat”. Quitament assegurèt que podiá pas suportar que “a un moment coma aqueste, se faguèsse de campanhas negativas per interès politic”. Pasmens, en junh que ven, deu afrontar l’eleccion presidenciala, e l’oposicion li atribuís ja la responsabilitat del naut nombre de victimas del desastre.
 
Mentretant, alara que las principalas societats turcas davalan en borsa, de societats de betum coma NUH, Konya, Afyon o Çimbeton veson l’aument del prètz de lors accions. Es un movement especulatiu d’investidors que calculan que las accions se revalorizaràn quand començaràn los prètzfaches de reconstruccion. La societat qu’ara per ara obten mai de profièch de la catastròfa es Bülbüloğlu Vinç San. ve Tic. A.Ş., que se consagra a fornir de maquinas de grand tonatge per la construccion coma las gruas.

 
 
abonar los amics de Jornalet

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
2.

#1 Jamai ! Promés e jurat !

  • 3
  • 0
Pitaluga
1.

Aquò son de causas qu'arriban pas en cò nòstre, vertat ?

  • 1
  • 0

Escriu un comentari sus aqueste article