Bandièra01 1180x150: País Invisible

Actualitats

Una protèsta curda a interromput l’activitat del Parlament Europèu

Una quinzena de manifestants reclamavan la libertat d'Abdullah Öcalan

Tèxte legit

Una protèsta que reclamava la liberacion del cap istoric del Partit dels Trabalhadors de Curdistan (PKK), Abdullah Öcalan, faguèt suspendre dimècres passat la sesilha plenièra del Parlament Europèu pendent tres oras a sa sedença d’Estrasborg.
 
Los manifestants, una quinzena de joves curds, irrompèron dins la sesilha en tot cridar “libertat per Öcalan” e getèron de papièrs blancs, de la tribuna dels vesitaires estant, mentre qu’interveniá l’eurodeputat neerlandés Mohammed Chahim, del grop dels socialistas europèus.
 
La sesilha s’interrompèt a 11h47, pendent un quart d’ora, quand la vicepresidenta del Parlament Europèu, Pina Picierno, convidèt sos collègas a evacuar la sala. La sesilha se poguèt pas reprene abans 15h. Pasmens, segon la presidenta de l’eurocambra, Roberta Metsola, l’incident se resolguèt d’un biais pacific.
 
“Aqueste parlament defend amb fiertat la libertat d’expression e lo drech de protèsta, mas tota manifestacion deu totjorn respectar las nòrmas e proceduras de la seguretat publica e non perturbar pas lo debat democratic”, çò assolidèt.
 
Metsola diguèt que voliá pas “donar a la causa la publicitat que cèrca”, perque la presidenta se pensa qu’es “pas lo biais d’atirar l’atencion de l’eurocambra”, qu’es “dobèrta e accessibla” mas que pren de decisions d’una manièra pacifica e tranquilla.
 
En decembre passat, Öcalan presentèt un recors davant la Cort Europèa dels Dreches Umans (CÈDU) contra Grècia perque considerava que s’èra mancat a son drech de sollicitar l’asil en 1999, quand foguèt arrestat dins l’ambaissada del país en Kenya. La CÈDU acceptèt lo recors.

 
 

abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
1.

Pas tant de rambalh ! Anatz revelhar los deputats que fan un penequet en somiant que l'Erdogan lor adoba la patz en Ucraïna.
Paures Curdes, que i a totjorn quicòm de mai important de préner en compte que la repression que patisson.

  • 2
  • 0

Escriu un comentari sus aqueste article