Bandièra01 1180x150: País Invisible

Actualitats

Biden preven Putin qu’Ucraïna “serà pas jamai una victòria per Russia”

“Putin a causit la guèrra. Cada jorn que la guèrra contunha es una causida siá”, çò a dich

Tèxte legit

“Ucraïna serà pas jamai una victòria per Russia”, çò avisèt lo president dels Estats Units, Joe Biden, dimars passat en responsa al president rus, Vladimir Putin. “Retirarem pas nòstre sosten a Ucraïna, l’OTAN se devesirà pas e nos alassarem pas”, çò declarèt Biden dins un discors a Varsòvia a l’ocasion del anniversari de la guèrra d’Ucraïna, país que veniá de vesitar acompanhat del president ucraïnés Volodimir Zelenski.
 
Biden remarquèt que los Estats Units mantendrián lor supòrt a Ucraïna e “defendrián la democracia”, qué que se passèsse. Dins lo meteis sens, afirmèt qu’aquela guèrra auriá refortit las democracias e afeblit las autocracias. A mai, anoncièt l’aprobacion de nòvas sancions contra Russia.
 
Per Biden, es Russia qu’a causit de respectar pas lo sistèma internacional de seguretat: “Putin a causit la guèrra. Cada jorn que la guèrra contunha es una causida siá”, çò diguèt.
 
Lo sosten a Ucraïna se mantendrà pr’amor que “se quita de se defendre, serà sa fin”, çò assegurèt en tot prevenir que caliá far “pagar” Russia per “sos abuses” e menar los responsables de la guèrra davant la justícia per crimes contra l'umanitat. Aguèt tanben de paraulas de solidaritat envèrs los refugiats e acusèt lo Kremlin de causar una crisi alimentària.
 
Enfin, lo president dels Estats Units revendiquèt lo ròtle de l’OTAN dins lo conflicte.
 
Per quant a la suspension russa del Nòu Tractat de Reduccion d’Armas Estrategicas (START), Biden diguèt pas res. Si qu’o mençonèt lo secretari d’estat dels Estats Units, Antony Blinken, que qualifiquèt la decision de malaürosa” e “fòrça irresponsabla”.


abonar los amics de Jornalet

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ugenon
2.

#1 La lei dau pus feble nimai…

  • 0
  • 0
Frtanc Bardòu
1.

La lei del mai fòrt non serà pas jamai una victòria per l'umanitat d'ont que siá.

  • 6
  • 0

Escriu un comentari sus aqueste article