Segonda victòria pels Dragons
 
Los Dragons tornèron raspats per la pelena de Wakefield: calguèt demesir los entraïnaments per se poder sonhar. McNamara, l’entraïnaire, deguèt compausar amb 9 jogaires indisponibles. Atal, 13 catalans e occitans se trapèron sul fuèlh de partida fàcia als Leopards de Leigh. Enfin, puslèu 12 que 13, vist que Zenon dintrèt pas, coma èra ja lo cas la setmana passada.
 
Los Sang e Aur tenguèron còp en defensa. En fin de primièra part, Artús Morgue marquèt una penalitat, puèi Tom Johnstone ajustèt un tresen ensag a sas realizacions de l’an. A la pausa, los catalans menavan 8-0. Leigh marcava tre la represa, mas un ensag en fòrça de Goudemand, transformat per Morgue, confirmava la victòria dels locals (14-6).
 
Tre aqueste divendres 3, los Dragons recebràn Hull FC, una esquipa qu’es anada ganhar a Leeds 22-18 aprèp aver batut Castleford 32-30.
 
Per aquesta segonda jornada, Hull KR, que serà a Perpinhan lo 18 de març, va batre Salford 24-10. Warrington s’impausa a Huddersfield 26-16 e Wigan fa pas las causas a mièjas fàcia a Wakefield: victòria 60-0. Dimenge, lo campion Saint Helens dintra dins la competicion amb una victòria a Castleford 24-6.
 
Pel compte de la tresena jornada, se jogaràn tanben las partidas: Warrington-Salford, dijòus; Wakefield-Huddersfield, Saint Helens-Leeds, Castleford-Wigan e Hull KR-Leigh, divendres.
 
En Championship, primièra desfaita dels tolosans: menan 12-8 a la pausa, mas Bradford ganha 28-18. Dissabte, a 18h, los occitans reçaupràn Whitehaven.
 
 
Television: lo pati
 
BeInSport retransmetrà pas las partidas de Superliga. Per ara, se sap que la cadena L’Équipe Live es prèsta per passar de rescontres dels Dragons.
 
Per l’NRL, alara qu’arriba la primièra jornada, BeInSport a pas encara trapat per ara d’acòrdi amb los proprietaris dels dreits.
 
 
Elèit 1: fèsta degalhada a Lesinhan
 
Aqueste dissabte, al Molin de Lesinhan, la tribuna novèla, bastida de nòu aprèp un incendi, se batejava del nom de Miquèl Maïque, ancian capitani d l’FCL e del XIII de França (del temps ont se batián los angleses e los australians), puèi cònsol màger de la vila. Un repais ramosèt mai de 400 personas a l’entorn dels produits del terrador e dels vins de Corbièras. Demorava de jogar lo dèrbi fàcia a Limós e lo revenge a prene pels locals, batuts a l’anar 56-10. Limós dintrava plan dins la partida, menava lèu 10-0 mas, a la pausa, las 2 formacions èran a egalitat 12-12. Dins lo segond temps, los Molinièrs capitèron pas a enganar la defensa limosenca. Doas acceleracions dels Blanquetièrs se concretizavan per dos ensages transformats. Per faire bona mesura, sus la còrna, lo dobertura Templeman, òme de la partida, passava la penalitat que sortissiá los Verd e Blanc del punt de bònus defensiu: 26-12 per Limós.
 
Doas partidas confirmèron las resultas dels 8ns de Copa. A Albi, Vilanòva ten còp fins a la pausa (8-8), mas pèrd: 32-8; Avinhon, dins un partida deslocalizada a Entraigas, domina los Dragonets: 58-12. Dimenge, a Carcassona, dins la ventòrla, los Canaris coneisson de dificultats per batre Tolosa 30-24. L’aprèp-partida foguèt assegurada en occitan per Cristian Almerge. Sent Gaudenç bat Pià 35-22 e garda un pichon espèr de qualificacion.
 
 
Los quarts de Copa al programa
 
Dimenjada de Copa Lòrd Derby amb dissabte las partidas Limós-St Gaudenç (15h) , Avinhon-Pià (17h) e lo dèrbi Carcassona-Lesinhan (18h). Dimenge, lo darrièr club qualificat d’Elèit 2, Vilagalhenc-Argon, reçaup los Tigres d’Albi (16h).
 
 
NRL: l’ ora de la represa
 
En Austràlia, la partida Parramatta-Melbourne dobrirà dijòus lo campionat NRL de 2023. Seguiràn divendres las partidas entre los campions Penrith e los Bròncos, e los Warriors de Nòva Zelanda fàcia a Newcastle. Dissabte, se jogaràn las partidas Manly-Canterbury, Vaquièrs-Canberra, Cronulla-Rabbitohs, puèi dimenge Dalfins-Roosters e West Tigers-Titans.
 
 
 
 
Alan Roch