A Antíbol (Vencenc), dempuèi mièg febrièr l’anticiclòn a fach baissar lo nivèl de la mar Mediterranèa d'un trentenat de centimètres. Aquò a permés de tornar descobrir un vestigi arqueologic, çò rapòrta France 3. An trobat un vivièr roman. Un genre de bac que lo retirament de la mar daissa aparéisser dos còps per an.
 
S’agís d’un rectangle d’aperaquí 5 mètres sus 4 e de 60 cm de prigondor. A l'epòca romana, èra fòrça mai prigond. Considerat coma l’ancessor de l’aqüacultura, aquel vivièr èra una sòrta d’aqüari ont los peisses èran dirèctament pescats e manjats encara bombilhaires, après èsser estats cabussats dins una salsa apelada garum, condiment confeccionat a partir de viscèras o de carns de peis longtemps fermentadas dins la sal. Lo garum d'Antipolis, es a dire d’Antíbol, èra plan reputat a l’epòca.