Aquesta dimenjada, se debanavan los quarts de finala de la Copa Lòrd Derby. A Limós, dissabte, dins una partida de sens unic, los locals dominèron Sent Gaudenç : 42-6. A Avinhon, fàcia a Pià, los provençals fan la diferéncia dins lo primièr temps e eliminan los catalans : 18-8.
 
A Carcassona, l’esperit d’entrepresa e lo vam èran del costat dels Canaris ; Lesinhan se perdèt en rason de l’indisciplina (un roge e un jaune pendant la partida, mai un roge al còp de fiulet final!). Los Canaris marquèron quatre ensages contra tres a Lesinhan. Amb las quatre transformacions e doas penalitats d’Herrero, la marca finala foguèt de 28-14.
 
Dimenge, a Vilagalhenc, lo VARL (Elèit 2) recebiá los Tigres d’Albi. Los locals opausèron una brava resisténcia, prenguèron d’iniciativas mas la victòria anèt als mai fòrts : 42-20.
 
Per Pascas, a Albi, se jogaràn las mièjas finalas : Carcassona-Avinhon e Limós-Albi. Finala quinze jorns mai tard a Perpinhan.
 
 
Los Dragons asfixian Hull FC
 
En Superliga, los Dragons Catalans recebián una formacion qu’aviá tanben ganhadas sas primièras doas partidas : Hull FC. Al cap de 4 minutas, tocat a la cavilha, César Rougé sortissiá. Èra lo meteis sòrt pel pilar Navarette cap a la vintena minuta. Arthur Keighran reposicionat a la dobertura orquestrèt lo jòc dels Sang e Aur que faguèron una diferéncia bèla: victòria catalana 38-14. Las causas seràn mai complicadas aqueste dijòus amb un desplaçament a Wigan qu’es anat ganhar a Castleford: 36-0!.
 
De notar, la susprenenta victòria de Leeds fàcia al campion St Helens : 25-24.
 
En Championship, lo Tolosa Olimpic daissa pas s’exprimir Whitehaven e ganha : 72-10! Dos desplaçaments a venir per l’esquipa occitana: a Widnes, lo dissabte 18, e a Sheffield lo dissabte 25 de març.
 
 
NRL de 2023 : aquò promet !
 
Granda paur pels afogats de l’NRL. BeInSports a esperat lo 1r de març per anonciar la signatura d’un acòrdi per retransmetre l’NRL e los State of Origine per 3 sasons (fins en 2025). Atal, se poiràn seguir 4 partidas per jornada de campionat: una cada jorn del dijòus al dimenge.
 
La primièra partida, lo dijòus 2 de març, entre Parramatta e Melbourne anèt al punt en aur, e Melbourne ganhèt 16-12.
 
Divendres 3, a domicili, los campions de las Pantèras de Penrith pèrdon 13-12 fàcia als Bròncos de Brisbane que miran una qualificacion que lor escapèt amb las partidas perdudas en fin de sason. Los Combatents neozelandeses tornan jogar al país e viraràn d’un estadi a l’autre: a Wellington, baton Newcastle 20-12. Los Vaquièrs baton Canberra d’un punt 19-18.
 
Dimenge 5, los Dalfins jogavan lor primièr rescontre d’NRL. Recebián los Polets al Sun Corps de Brisbane. Se trufant dels pronostics, la novèla formacion signa sa primièra victòria dins la competicion : 28-18.

 
 
 
 
Alan Roch