Dissabte, en fin de vèspre, los Dracs recebián los Taures de Bradfòrd a Brutús. Las primièras minutas èran dificilas e al cap de mièja-ora, los vesitors menavan 10-0. E aquí lo banc catalan dintrèt amb d’arguments de pes (Elimà, Bosquet, Faquir) per contunhar lo trabalh de sapa entreprés per Simon e Casty; Eloi Pelissièr venguèt accelerar la circulacion de la pauma al ras dels tenguts. E Bosquet marquèt en fòrça al pè dels pals, Tomàs Bòsc transformèt: 10-6 pels angleses a la pausa. Lo segond temps foguèt del tot al tot catalan e, entre moviments de tria e iniciativas personalas, los ensags s’encadenèron: Loís Anderson (52a), Morgan Escaré (56a), Daril Millard (64a) , Zeb Taia (67a) e Leon Pryce (72a). Amb doas transformacions de mai del Tomàs Bòsc, aquò fa un supèrbe 30-10 plan meritat e una plaça a un sol punt del cap de fila, los Gigants d’Huddersfield, al classament. Lo jove arrièr dels Dragonets, Morgan Escarré, foguèt designat òme de la partida per sa primièra titularizacion cò dels Dracs.
 
E Pascas es lo temps dels trabalhs d’Ercules per las formacions de Super-Liga: atal, los Dracs van afrontar los London Broncos dijòus en serada abans de reçaupre los campions de Leeds diluns 1r d’abril (a 18h15) e de tornar prene lo camin d’Anglatèrra per rescontrar Hull FC lo dimenge 7 de vèspre.
 
En Australia, los Storms de Melbourne entamenan la competicion NRL de 2013 amb una tièra de tres victòrias per se portar al cap del classament.
 
En campionat d’Elèit, Limós perdèt sas darrièras possibilitats de qualificacion dimècres fàcia a Vilanòva 38-26 e poguèt pas resistir dimenge al vam de Tolosa: 44-10.
 
Demòra doas jornadas de fasa de classament abans de passar a la fasa d’eliminacion dirècta: dissabte, l’ASCarcassona reçauprà Tolosa (18h30) e Lesinhan jogarà a Avinhon (17h); aqueles dos rescontres son importants per fixar lo classament de la 3a e la 6a plaça e per determinar los afrontaments dels barratges dels 13 e 14 d’abril.
 
Dimenge, Pià rendrà vesita a Limós e los Dragonets a Vilanòva d’Òlt.
 
Un brave programa: a creire que l’uòu de Pascas es una pauma de rugbi!
 
La Federacion a confirmat que las doas mièja-finalas del campionat se debanarián lo dimenge 28 d’abril de vèspre sus l’estadi dels Minimes a Tolosa. En cadet, la finala de la Copa de França metrà a las presas l’equipa de l’Ostal dels Joves de Carcassona venceira del XIII Catalan 27-24 a la darrièra minuta e Albi qu’escarta aisidament 34/8 la còlha de Limós.
 
L’equipa de França dels cadets va disputar doas partidas internacionalas en Anglatèrra aqueste divendres 29 de març e lo dimars 2 d’abril. A tote los nivèls, las fasas de classament van sus la fin e las partidas eliminatòrias van prene la volada amb un paquet d’emocions a venir. Qual se’n planhiriá?
 
 
 
 
Alan Roch