"Vos inquietetz pas pas perque lo que me succedirà es capacitat d'o far", a dich Pep Guardiola divendres a miègjorn quand a anonciat publicament que quitarà d'entraïnar lo Barça a la fin de la sason. E lo que li prendrà la relèva serà lo sieu òme de mai granda fisança, Tito Vilanova. "L'entraïnaire deu aver l'energia que n’es de besonh per la transmetre als jogaires, e a ieu me la cal recuperar, en me pausant, en m'alonhant. Ai la percepcion qu'auriam pres mal totes", a explicat Guardiola, qu'a dich qu'aviá presa la decision en octòbre passat e que se n'anava amb la sensacion del dever complit. 


 


"Me soi vojat e ai besonh de m'emplir", a dich Pep Guardiola, en mercejant los jogaires, "que i a agut de milions de jogadas e de partidas imaginadas qu'eles n'an fach una realitat". E a apondut: "lèu o tard probablament tornarai entraïnar. N'ai pas enveja ara, e çò que ieu farai ara es pas interessant".


 


Los jogaires barcelonistas Iniesta, Valdés, Puyol, Xavi, Cesc, Piqué, Busquets e Pedro an acompanhat Guardiola dins la sala de premsa, on tanben a comparegut lo president del club, Sandro Rosell, e lo director tecnic, Andoni Zubizarreta. Rosell l'a mercejat: "pel bonaür que nos as balhat e qu'as portat al Barça". E a dich que jamai pus poirà pas èsser questionat lo modèl. Fin finala, Guardiola s'es adreçat als jogaires per lor dire: "gojats, me'n vau".