An escartat lo parlament chipriòta de la decision sus las mesuras duras. Segon Russia, s’agís d’un raubatòri. Nicosia salvarà la primièra bancade l’illa, mas liquidarà la segonda e impausarà de pèrdas fòrça importants als depauses de mai de 100 000 èuros.

Als petits estalviaires amb mens de 100 000 èuros, lor caldrà pas pagar res pel salvament, mas lo puniment als grands depausants serà fòrça dur. Après mai de dètz oras de negociacion a Brussèlas, diluns de matin, l’FMI, la BCE e la Comission Europèa pachèron amb lo president chipriòta, Nikos Anastasiadis, de salvar la primièra banca de l’illa, la Banca de Chipre, e de liquidar solament la segonda, Laiki, en escambi d’impausar als grands depausants de pèrdas fòrça importantas, encara de concretizar, mas que poirián arribar dins qualque cas a 50%.
 
Aital la tròica europèa càmbia d’idèa e protegirà los depauses inferiors als 100 000 èuros, qu’èran teoricament garentits per la legislacion comunautària (mas qu’inicialament, l’Eurogrop e lo govèrn chipriòta los volián utilizar per pagar una partida del salvament). La BCE aviá menaçat, de fach, de copar la liquiditat de las bancas chipriòtas uèi, se i aviá pas acòrdi.
 
L’acòrdi es arribat qualques oras abans la data limit per evitar un esfondrament del sistèma bancari e que se copèsse la liquiditat a las bancas chipriòtas, çò qu’auriá causat la sortida del país de l’èuro e la quincanèla.
 
Lo president del Conselh Europèu, Herman Van Rompuy, a demandat d’aplicar aquel acòrdi lo mai lèu possible perque lo considèra “essencial per garentir un avenir durable de Chipre dins l’Eurozòna e evitar que la situacion venga encara mai critica”, çò diguèt.
 
An escartat lo parlament de la decision
 
Es chocant que, fin finala, caldrà pas que lo parlament chipriòta apròve aquel acòrdi, perque lo recobrament se farà pas en forma de taxa suls depauses, mas de prelevament ; çò que se considèra pas mai una mesura fiscala per recobrar de taxas mas una mesura per redusir la carga de las bancas. E Nicosia aprovèt ja divendres passat una restructuracion bancària que permet, justament, de liquidar de bancas e d’impausar de pèrdas als accionaris e als depausants.
 
Tot aquò o a negociat de nuèch lo president chipriòta, Nikos Anastasiadis, amb los pus grands representants de la tròica: la directritz gerenta del Fons Monetari Internacional (FMI), Christine Lagarde, e los presidents de la BCE, Mario Draghi, e de la Comission, José Manuel Durão Barroso.
 
 
Segon Russia, s’agís d’un raubatòri
 
Lo pimièr ministre rus, Dmitrii Medvedev, a qualificat l’acòrdi de raubatòri que contunha de pilhar lo butin, en referéncia a la quantitat de russes que se veiràn afectats per lo prelevament sus los depauses superiors als 100 000 èuros.
 
 
 
 

Lo plan bancari per Chipre poiriá èsser un modèl per d’autres païses   Lo plan de salvament elaborat per Chipre representa un encastre nòu de resolucion de las dificultats bancàrias de la Zòna Èuro; e d’autres païses poirián aver de restructurar lor sector bancari, çò declarèt ièr Jeroen Dijsselbloem, lo president de l’Eurogrop. “Çò qu’avèm fach la nuèch passada, es çò qu’apèli refusar los risques”, çò diguèt a Reuters e al Financial Times.   “Se i a un risc dins una banca, la nòstra primièra question deuriá èsser: «D’acòrdi, qu’anatz far, vosautres, dins la banca? Que podètz far per vos recapitalitzar vosautres meteisses?»”, çò expliquèt, abans de precisar que “se la banca o pòt pas far ela meteissa, alavetz discutirem amb los accionairs e los creditors obligataris, lor demandarem de contribuir en recapitalizant la banca e, se cal, [demandarem] als detentors de depauses non garentits.”   A la question sus la fasabilitat d’aquela nòva aprochada dins d’autres païses de l’èuro amb un sistèma bancari semblable al de Chipre, coma Luxemborg o Malta, o quitament d’autres ont las bancas son en dificultat coma Eslovènia, Dijsselbloem repondèt qu’aqueles païses devon considerar una reduccion del pes de lor sector bancari.   Los mots de Dijsselbloem an agut un impacte immediat dins los mercats financièrs. En Espanha an paur qu’Euròpa vòlga liquidar Bankia, la banca nacionalizada, que sas accions uèi an perdut 35% de lor valor.   Dins las borsas, las vendas an pojat, mai que mai las de las bancas. Entre los principals indèxes europèus, los qu’an sofèrt mai del cambiament de vejaire del cap de l’Eurogrop son estats Madrid, qu’es arribat a davalar de 2,6%, e Milan, qu’a tombat dins la meteissa proporcion. Aquò a fach davalar las autras borsas d’Euròpa. La possibilitat d’exportar la via chipriòta a d’autres païses a fach aumentar la pression sul deute, mai que mai en Espanha e Itàlia.