L’actualitat nos confirma la catalanitat del club dels Dragons. Atal, TV3 anóncia que difusarà sus sas antenas de partidas del club. La cadena catalana a trapat un acòrdi amb la Superliga e IMG per la difusion dels Dragons en Catalonha.

Per ara, 4 retransmissions son previstas: lo desplaçament a Leeds (25 de març), las recepcions de Warrington (8 d’abril) e de St Helens (5 de mai) coma la partida de la Dimenjada Magica fàcia a Wigan (3 de junh).
 
Abans la partida fàcia a Hull KR, lo club a signat d'acòrdis amb las escòlas catalanas Bressola e amb la Plataforma per la Llengua.
 
Sul terre, los Dragons contunhan la tièra de victòrias: cinc en seguida. Marcan 5 ensages a Hull KR: quatre pels alièrs (3 per Tom Johnstone) e un del pilar Julian Bosquet: victòria 26-12. Demòran en cap del classament en companhiá de Warrington qu’a ganhat 38-20 fàcia a Leigh.
 
Dijòus 16, Castleford ganhèt sa primièra partida: 14-8 fàcia a Leeds. Divendres 17, St Helens domina Hull FC  20-12 e Wigan va ganhar a Huddersfield: 14-12. Dimenge, cinquena desfaita per Wakefield batut per Salford 13-14.
 
En Championship, Tolosa ganha a Widnes 14-12 mercé a un ensag marcat dins las darrièras minutas. Novèl desplaçament aqueste dissabte 25 cò de las Aglas de Sheffield.
 
 
NRL: un dèrbi, aquò se prepara!
 
Divendres 24, se jogarà lo primièr dèrbi de Brisbane de l’istòria de l'NRL entre los Bròncos e los Dalfins. Los dos clubs alinhan tres victòrias. Los Dalfins an signat un succès novèl en ganhant a Newcastle 36-20. Los Bròncos an esperat lo segond temps per assucar los Dragons de Sant Jòrdi: 40-18.
 
A Sydney, los Polets an emportat lo dèrbi fàcia a de Lapinons en mal d’inspiracion e qu’an vendemiat plan d’ocasions de marcar. Victòria dels Roosters: 20-18. Los neozelandeses van ganhar cò dels Vaquièrs: 26-12. Festenals ofensius a Manly que bat Parramatta 34-30, e sus la Còsta d’Aur ont los Titans an la victòria 38-34 fàcia a Melbourne!
 
 
Elèit 1: astadas de Canaris per Pià
 
Dissabte, los albigeses se passegèron en Avinhon: victòria 54-16, mas perdèron pel demai de la sason l’arrièr Cristòl Hellec, nafrat.
 
Dimenge, Pià realiza un primièr temps de fuòc fàcia a Carcassona. Menan 30-0. Los Canaris capitaràn a agantar lo punt del bònus defensiu: victòria catalana 32-22. Limós marca nòu ensags per batre Sent Gaudenç (52-0) e Lesinhan va ganhar a Vilanòva (48-18); los Dragonets ganhan la partida de las resèrvas: 40-22 fàcia al TO.
 
Dissabte, la primièra plaça del classament serà en jòc dins lo dèrbi Carcassona-Limós, preparat dins un ambient festiu: taulejada-caçolet per 500 personas a miègjorn, rescontre a 3 oras (retransmés per ViaOccitanie), los juniors en seguissent, grasilhada-fritas e concèrt musical ! Dissabte tanben, Lesinhan reçauprà Avinhon e los Dragonets jogaràn a Albi. Dimenge, St Gaudenç-Vilanòva e Tolosa-Pià completaràn lo programa d’aquesta 16a jornada.
 
Lo dimenge 26, se tendrà a Carcassona lo torneg Grégoire de las escòlas de rugbi, de U7 a U13. Seguiràn, del 27 al 29 de març, al pè de Ciutat, las finalas de las competicions escolaras dels collegians e liceans.
 
 
Internacional: las francesas preparan lo viatge en Anglatèrra
 
Aqueste dissabte, aprèp la partida Avinhon-Albi, l’esquipa de França femenina recebiá son omològa de Serbia; la partida virèt a un gròs entraïnament per las Blavas que marcan 20 ensages per una victòria 116-0. L’oposicion serà tota autra a Warrington a la fin d’abril.
 
 
 
 
Alan Roch