Bandièra01 1180x150: Comuna de Tolosa

Actualitats

InternacionalPoliticaSocietat

Clara Ponsatí es tornada de son exili

L’elegida independentista catalana foguèt detenguda e mesa en libertat cinc oras après son retorn

Tèxte legit

Clara Ponsatí es tornada de son exili. L’elegida catalana, èx-ministra regionala de l’educacion enseguida pel referendum d’independéncia del 1r d’octòbre de 2017, decidiguèt dimars de tornar a Barcelona e de far valer son immunitat coma deputada del Parlament Europèu. A la diferéncia d’autres exiliats politics que se son presentats davant lo jutge a Madrid, Ponsatí a decidit de tornar al país amb dignitat e sens passar per la Cort Suprèma de Madrid.
 
“Soi pas venguda per far cap de pache amb l’estat, mas per denonciar lo greujament sistematic de nòstres dreches, la passivitat de las institucions catalanas e lo besonh que las institucions europèas quiten d’agachar endacòm mai fàcia a la violacion sistematica de l’estat de drech en Catalonha”, çò diguèt.
 
Aguèt temps de far una conferéncia de premsa al Collègi dels Jornalistas de Catalonha e puèi foguèt detenguda mentre que se passejava al centre de Barcelona. Lo moment de l’arrestacion foguèt retransmés en dirècte car Ponsatí èra environada de jornalistas.
 
Après cinc oras de detencion, foguèt remesa en libertat a la Ciutat de la Justícia de Barcelona ont de centenas de personas manifestavan contra son arrestacion. Lo jutge de Madrid li demandèt que se presentèsse a la Cort Suprèma espanhòla lo 24 d’abril  a 11h per que li foguèsse comunicat son procès judiciari per desobesissença. Ièr participèt a la sesilha parlamentària de Brussèlas, ont d’eurodeputats saludèron sa liberacion, mentre qu’ela criticava publicament la presidenta del parlament per son inaccion en favor d’una deputada europèa.
 
Ponsatí foguèt arrestada en plen jorn davant las camèras mentre que brandava sa carta d’europarlamentària. Èra lo primièra còp que s’arrestava un eurodeputat protegit per son immunitat. Aquel fach pòt aver una repercussion dins l’enquista que la mena a bon tèrme la Cort de Justícia de l’Union Europèa sus l’immunitat dels elegits catalans en exili. Un fach que caldrà seguir car poirià implicar lo retorn de Carles Puigdemont.

 
 
 
 
 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gerard Joan Barceló Pèiralata
5.

#1 Se volètz mas lo catalan parla pas de ministre. Los "ministres de la Generalitat" lor dison "consellers" en catalan. Avèm escrich "ministre regional" per cercar un equivalent pels legeires fòra de Catalonha. Un còp legiguèri "ministre" mas sonque lo vèspre de l'efemèra declaracion d'independéncia del 27 d'octòbre de 2017, dins un article de Vilaweb.

  • 5
  • 0
Pitaluga
3.

Clara Ponsatí es una dòna liura. Una de las paucas qu'on son vertadièrament.
La mercejam per son coratge e per sa vision clara de la politica politiciana, tant en Euròpa coma en Espanha.
La mercejam de téner targa a la law fare.
La mercejam de se daissar pas engarçar per tota la còla politico-mediatica.
Òsca, dòna Ponsatí !

  • 6
  • 1
Carles països valencians
2.

tot ha sigut un montatge ... per favor encara n'hi han qui creuen en eixes quimeres... vergonyós, cal polítics amb valenctia, valors humans, que np manipulen a la gent.

  • 1
  • 12
ct
1.

èx-ministra de la Generalitat et non pas "regionala".

  • 7
  • 4

Escriu un comentari sus aqueste article