Bandièra01 1180x150: País Invisible

Actualitats

Es mòrt lo cap istoric aborigèn australian Yunupingu a 74 ans

L’activista e artista a trespassat dètz jorns après que s’anoncièt un referendum sus la reconeissença constitucionala dels indigènas

Yunupingu en 1977
Yunupingu en 1977 | Library & Archives NT

Tèxte legit

Un dels caps mai eminents dels pòbles aborigèns d’Austràlia, Yunupingu, defuntèt diluns 3 d’abril a 74 ans, après una vida consagrada a la lucha pels dreches dels indigènas de l’illa-continent.
 
Yunupingu fasiá partida del pòble yolngu, originari de l’extrèm septentrional del Territòri del Nòrd. Artista e activista, se destaquèt per sa participacion a diferentas demandas de reconeissença dels pòbles aborigèns al govèrn australian e per la defensa dels dreches d’aqueles pòbles davant las societats minièras. Yunupingu reclamèt pendent tota sa vida lo drech dels pòbles aborigèns a prene lors pròprias decisions suls afars que pertocavan lors territòris.
 
Dempuèi 2019, Yunupingu èra estat un dels vint membres del grop consultatiu qu’a contribuit a definir la nomenada Votz Indigèna al Parlament, un organisme que donarà pel primièr còp una representacion permanenta dels pòbles aborigèns davant lo govèrn e lo parlament australian. Serà consultatiu e sens drech de vòte se sa creacion ven aprovada en fin d'ongan. Lo referendum, anonciat lo 23 de març pel primièr ministre Anthony Albanese, prevei la modificacion de la Constitucion, çò que comportariá la primièra reconeissença constitucionala dels aborigèns dins lo tèxt.

 
 
 
 Aquesta nòva es adaptada de Nationalia, amb qui Jornalet ten un acòrdi de cooperacion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

artur quintana font La Codonyera (Aragon)
1.

Ni veu ni vot!

  • 2
  • 1

Escriu un comentari sus aqueste article