Bandièra01 1180x150: País Invisible

Actualitats

crotz-tolosaCreated with Sketch.LengadòcLengadòc NautTolosan

Sent Lis: le duo ThouxAzun au collègi Léo Ferré

Les diluns 3 e dimars 4 d’abriu, le collègi Léo Ferré vibrèc au ritme occitan: dus dias d’animacions pedagogicas i èran organizats e assegurats peu duo ThouxAzun compausat de Guillaume Lopez e Clément Rousse.


Concèrts de sensibilizacion
 
Le collègi prepausa un percors bilingüe . Nos semblèc judiciós de valorizar l’ensenhament de l’occitan en tot perpausar ua sensibilizacion a totas las classas de 6a, com aquò se hè dumpuèi 12 ans au collègi (le projècte qu’èra dinc ara portat per Olivier Bérard, professor de matematicas e de Disciplina Non Lingüistica au collègi). La jornada deu diluns èra donc consacrada a 3 sessions de concèrts a destinacion de las 6 classas de siesenas e escolans de cinquena, quatrena e tresena qui seguissen le percors bilingüe.
 
Atau, haut o baish 200 escolans deu collègi avón l’astre d’assistir a ua animacion pedagogica damb le duo ThouxAzun. Les artistas perpausèn un concèrt pedagogic que mesclava presentacion d’instruments tradicionaus, escambis damb les escolans a l’entorn deu lor mestièr, de las musicas tradicionalas e de las musicas deu Monde. Lor presentèn diferents instruments tradicionaus que botèn en scèna. En amont, les escolans avèvan aprés damb la lora professora d’educacion musicala, Aurélie Castel, ua cançon deu repertòri deus artistas, La ronda de sason, que podón cantar damb le duo. Dins un esperit d’escambi e de transmission, Guillaume Lopez evoquèc tanben la tecnica vocala e sustot les ornaments presents dins lo cant tradicionau. Aquera tecnica qu’estóc tanlèu apracticada peus escolans, dont daubuns prengón le micro .
 
 
Ligason escòla - collègi 
 
Le dimars matin, dens l’encastre de la ligason escòla-collègi, son los escolans bilingües deu CE1 au CM2 qu’avón le parat d’assistir a ua representacion deu medish espectacle deu duo ThouxAzun, acompanhats peus lors dus ensenhaires, Magali Bacca e Mathieu Emportes.
 
En tot, son mès de 250 escolans que participèn ad aquestes concèrts pedagogics.
 
 
Talhèrs entaus escolans de la seccion bilingua deu collègi 
 
Le dimars de vrèspe èra un temps reservat aus nòstres escolans de la seccion bilingua occitan. Cadun deus quate nivèus (regropats per 2) poscóc beneficiar de duas òras de talhèr ende un moment privilegiat au près deus artistas. Poscón tornar mès en pregondor dins l’univèrs musicau deus artistas e descobrir musicas tradicionalas d’autres país. Acompanhat per Clément Rousse a l’acordeon, Guillaume Lopez lor ensenhèc coma dançar la ronda de Carcin. Beneficièn d’explicacions a l’entorn de daubuas practicas dins le cant tradicionau (question/responsa) mes tanben d’un talhèr d’escritura a partir de la cançon apresa. Atau, cada grop poscóc compausar sus La ronda de la sason. Les siesenas -cinquenas escrivón les coblets relatius aus mes absents dins la cançon . Les quatrenas-tresenas tribalhèn eths sus tèmas que causiscón (espòrt, ecologia, societat de consum, guèrra e musica). Cada grop poscóc votar en votz le coblet escrit, la classa que hasèva los còrs.
 
Aqueras duas jornadas, de las ricas en tèrmes d’escambis, de descobèrtas, d’aprendissatges e de convivialitat, que son estadas hèitas possiblas mercés au finançament integrau per l’associacion d’Arts e d’Òc (associacion qu’ajuda au finançament d’espectacles e projèctes culturaus en occitan dins les collègis de Nauta Garona).
 
 
 
VL

 
 
 
fffff fffff
 Jornalet a l'escòla

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

 Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…
 
   

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Escriu un comentari sus aqueste article