Bandièra01 1180x150: Comuna de Tolosa

Actualitats

Rugbi de XIII: Canaris e Tigres se balhan rendètz-vos a Brutus

Lo canari Drodrolagi escapa a la defensa d’Avinhon e va marcar un ensag
Lo canari Drodrolagi escapa a la defensa d’Avinhon e va marcar un ensag | maxppp / La Dépêche

Tèxte legit

Aquesta dimenjada de Pascas èra vodada a las Copas, en particular a Albi ont l’Estadium municipal recebiá las mièjas finalas de la Copa Lòrd Derby e las mièjas finalas d’U15, U17 e U19.
 


Carcassona rescontrava Avinhon. Los provençals marquèron una penalitat. Amb dos ensages marcats, los Canaris menavan 10-2 a la pausa. Amb la precision del jòc al pè e las cargas dels davants, Carcassona s’envolèt dins lo segond temps per ganhar 46-14.
 
Mai sarrat foguèt lo rescontre entre Albi e Limós. Dins una partida de nauta intensitat fisica e ofensiva, pel tresen còp de la sason, los albigeses s’impausan 34-28.
 
En juniors, ne calguèt arribar a las temptativas de transformacion per que Carcassona batèsse Carpentràs: 26-26 e 3 còps de pè capitats a 2.
 
En U17, los albigeses ganhèron fàcia als catalans e rescontraràn en finala Baó, venceire dissabte 24-14 a Lesinhan.
 
En tota fin de partida en U15, una intercepcion balha la victòria al XIII Catalan fàcia a Carcassona 22-20. Dissabte, Selon s’èra qualificat per la finala fàcia a Salses 12-10.
 
En Federala, los Vals (ententa entre Val d’Orbiu e Val de Danha) empòrtan la Copa Falcou en batent Toluges 48-18.
 
En Nacionala, Palau va ganhar a Realmont 46-12 e empòrta la Copa Déjean.
 
Las finalas U15, U17, U19 e de la Copa Lòrd Derby se debanaràn dissabte 22 d’abril a Perpinhan.
 

Elèit 1: qual serà lo seisen qualificat?
 
Aquesta dimenjada, se disputarà la darrièra jornada de la fasa primièra del campionat d’Elèit 1. La seisena plaça qualificativa pels barratges serà en jòc a Avinhon que reçaup St Gaudenç: lo venceire serà qualificat e sason acabada pel perdent. La tresena plaça serà tanben en jòc entre Albi e Lesinhan. Se jogaràn tanben las partidas Limós-Tolosa e Vilanòva-Carcassona. Aquelas quatre partidas se tendràn dissabte de vèspre, alara que dimenge se disputarà lo dèrbi catalan Pià-Dragonets.
 
 
Superliga: los Lops an una dent de tròp
 
Gaireben onze mila espectators a Brutus seguiguèron dissabte l’afrontament entre los primièrs, los Lops de Warrington, e los segonds: los Dragons. Los catalans foguèron pas recompensats de lor investiment: las individualitats anglesas balhèron la victòria als Lops: 20-14.
 
L’avantdarrièr, Castleford, bat lo darrièr, Wakefield: 16-4. Dins lo dèrbi d’Hull, KR bat largament FC: 40-0. Wigan obten la victòria contra los campions de Saint Helens: 14-6. Marcas sarradas per Salford que ganha a Leigh 22-20 e per Leeds que bat Huddersfield 18-17.
 
Aqueste divendres en serada, los Dragons jogaràn cò dels Gigants d’Huddersfield.
 
En Championship, divendres, Tolosa domina Londres 52-0; aqueste dissabte 15, los occitans aniràn desfisar Keiglhey.
 
 
NRL: primièra desfaita pels Cavals Fòls
 
Suspresa en NRL ont los primadièrs, los Bròncos de Brisbane, se fan batre sus lor pelena per Canberra: 20-14, mas sèrvan lo cap del classament. Dins un dèrbi de Queensland, los Dalfins van batre los Vaquièrs 32-22. Melbourne domina los Polets 28-8. Los Lapinons van batre los Dògols 50-16 e Penrith es mai fòrt que Manly 44-12.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article