Bandièra01 1180x150: País Invisible

Actualitats

La polícia iraniana verificarà amb de camèras intelligentas se las femnas pòrtan l’hijab

A  mai, las autoritats demandan als grops islamistas radicals que fagan pas justícia per lor compte e quiten d’agarrir las femnas sens cairat islamic

Tèxte legit

La polícia d’Iran a anonciat qu’installariá de camèras e d’autras aisinas intelligentas per verificar lo compliment de la lei qu’obliga las femnas al pòrt de l’hijab. “La polícia utilizarà d’espleches innovants e de camèras intelligentas sus las vias publicas per identificar las gents que complirián pas la Lei de l’Hijab e de la Castedat Publica e evitar tota tension e tot conflicte amb los compatriòtas per aquel afar”, çò a anonciat la polícia iraniana dins un comunicat difusat per l’agéncia iraniana Mizan.
 
La polícia ditz que las camèras s’emplegaràn per enviar “de messatges d’avertiment” a las que respectarián pas aquela obligacion e las avertir de las consequéncias legalas de tornar cometre aquel delicte. An quitament menaçat d’emendas e de retiraments del passapòrt, del permés de conduir e del servici d’Internet.
 
En mai d’aquò, las autoritats an demandat als grops islamistas radicals que fagan pas justícia per lor compte e que quiten d’agarrir o secutar las femnas que pòrtan pas lo cairat islamic. Aquestes darrièrs meses, s’es publicat d’imatges e de vidèos d’agressions verbalas e fisicas contra de femnas sens hijab.
 
Dempuèi setembre passat son nombrosas las protèstas contra lo pòrt obligatòri de l’hijab après la mòrt de la jove femna curda, Jina Amini, mentre qu’era detenguda per aver pas portat pas lo cairat coma caliá. La repression d’aquelas protèstas es fòrça dura amb quitament de detencions e d’execucions.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
2.

E nosautres avèm l'equivalent amb la pintura indelebila que los gendarmes botan suls manifestants de Sainte Soline per los poder pescar a l'espital après la manifestacion.
Efectivament sèm sul sulhet de 1984.

  • 4
  • 1
George Orwell Catalonha omenatjada
1.

Big Brother is watching you…

  • 6
  • 0

Escriu un comentari sus aqueste article