Actualitats
Rugbi de XIII: lo triangle d’aur audenc en cap de fila de l’ Elèit 1
Logicament, lo primièr, Carcassona, s’anèt impausar 42-0 cò de la lantèrna roja, Vilanòva
Alan Roch
Tèxte legit
Aquesta dimenjada, se debanava la darrièra jornada de la fasa de classament de l’Elèit 1.
Logicament, lo primièr, Carcassona, s’anèt impausar 42-0 cò de la lantèrna roja, Vilanòva. Son segond, Limós, confirmèt sa plaça en batent l’avantdarrièr Tolosa (62-14) dins una partida a sens unic. De notar que los tolosans an engranjat 8 punts de bònus defensiu dins la sason!
La tresena plaça èra en jòc a Albi entre los Tigres e Lesinhan. Los audencs pèrdon 24-14, mas, mercé al bònus defensiu, acaban amb un punt d’avança fàcia a lor adversari del jorn.
La seisena plaça, qualificativa pels barratges, èra en jòc a Avinhon: los Orses se ganhèron la qualificacion 28-24, pròva de lor progrès a respècte de las sasons passadas. Lo dèrbi catalan completava dimenge la programacion: los Dragonets acaban la sason sus una victòria fàcia a Pià: 37-22.
A respècte de l’an passat, dins la lista dels qualificats, Pià e Sent Gaudenç remplaçan Avinhon e Dragonets. Los 7 e 8 de mai, los barratges opausaràn Lesinhan a St Gaudenç al Molin e Albi a Pià en tèrra tarnesa.
Dissabte de Copas a Brutus
Aqueste dissabte 22 d’abril, quatre finalas de Copa se tendràn a Perpinhan, sus l’estadi Brutus.
— a 11h30, la finala U15: XIII Catalan contra RC Selon
— a 13h, la finala U17: Albi RL XIII contra los Geckos Catalans
— a 15h, la finala U19-Copa Nitard: Tolosa fàcia a Carcassona
— a 17h15, la finala Copa Lòrd Derby entre Carcassona e Albi.
Los Dragons a l’arrèst
Segonda desfaita en seguida pels Dragons Catalans divendres de ser en desplaçament cò dels Gigants d’Huddersfield: 26-14. Los catalans recuolan a la quatrena plaça al classament abans d’anar dimenge que ven desfisar Salford, qu’a batut Castleford: 14-6.
Primièra desfaita de la sason (e a domicili) pels Lops de Warrington batuts per Wigan: 6-13.
Lo campion, Saint Helens, es pas dominaire per ara: desfaita cò d’Hull KR 26-14.
En Championship, Tolosa va ganhar a Keighley: 34-6. Partida venenta: lo dissabte 6 de mai a Swinton.
NRL: los neozelandeses dins lo còp
Reviscolada pel retorn sus lor tèrra, la formacion neozelandesa coneis de bons resultats que la plaça en tresena posicion aprèp 7 partidas. Aqueste dissabte, a Auckland, an batut los Vaquièrs: 22-14. De bravas victòrias pels Cavals Fòls 43-26 cò dels Titans; 36-14 pels Lapinons cò dels Dalfins; per Parramatta fàcia a Canterbury: 30-4.
Per contra, Penrith va ganhar d’un punt a Newcastle: 16-15 mercé a un tombat de Nathan Cleary dins las darrièras segondas.
Alan Roch
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari