Bandièra01 1180x150: Comuna de Tolosa

Actualitats

Merkel anóncia ara una "agenda de la creissença" per l'UE

S'es engatjada, ça que la, a trabalhar estrechament amb lo govèrn francés que sòrta de las urnas per motius de "responsabilitat politica"

| Vilaweb




La cancelièra alemanda, Angela Merkel, a anonciat la redaccion d'una 'agenda de la creissença' per l'Union Europèa, que deurà èsser prèsta per l'amassada dels caps d'estat e govèrn de l'UE lo mes de junh. Entre d'autras mesuras per impulsar la creissença dins l'UE, Merkel a prepausat que se refortiscan "las possibilitats de la Banca Europèa d'Investiments", segon las declaracions realizadas dissabte passat al jornal Leipziger Volkszeitung.


"La nòstra tòca es la de superar la crisi de deute [e o farem] sostenguts per dos pilars. Lo primièr, lo d'una solida politica fiscala, que sens ela serà pas possible d’aleujar aquesta crisi. Mas aquela mesura, tota soleta, sufís pas. Alavetz, cal adoptar una posicion politica per obténer que los estats membres tornen èsser competitius", a declarat Merkel. 
 


La cancelièra, dins aquel sens, a insistit sul "besonh d'abordar de reformas estructuralas" e d’"eliminar las barrièras qu'empedisson un desvolopament economic san". 
 


L'anonci de Merkel agrandís uèi las declaracions que faguèt divendres a la ràdio publica NDR ont soslinhèt qu'un pacte de creissença serviriá a completar lo pacte fiscal per una disciplina budgetària mai fòrta en Euròpa. 
 


Dins aquel sens, la cancelièra Merkel a refusat la possibilitat de copar o alterar lo mencionat pacte fiscal, coma a prepausat lo candidat socialista francés, François Hollande, favorit a las eleccions presidencialas. "I aurà pas de renegociacion", a assegurat. 



"L'an signat 25 caps de govèrn, es estat ratificat per Grècia e Portugal e en Irlanda serà objècte de referendum lo mes de mai", a declarat Merkel, qui s'es engatjada, ça que la, a trabalhar estrechament amb lo govèrn francés que sòrta de las urnas per motius de "responsabilitat politica".

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

garric
1.

Se parla d'una mena de "Plan Marshall" europenc de 200 miliards d'Euròs orientat cap a las infrastructuras de comunicacion e las energias renovelablas. La decision se prendrà al Som de Brussèlas a la fin de Junh. Baste que l'investiment, finançat per l'UE e sas bancas d'investiment, se faga ambe una vertadièira volontat d'integracion europenca per de trabalhs grands estructurants...

  • 0
  • 0

Escriu un comentari sus aqueste article