Bandièra01 1180x150: Comuna de Tolosa

Actualitats

Rugbi XIII. Quand Pià fa l’ase

Los Papós, que seràn dins lo grop de França, en camp d’entraïnament en vista de la Copa del Monde.
Los Papós, que seràn dins lo grop de França, en camp d’entraïnament en vista de la Copa del Monde.
Un pichon torn de Cup e puèi se’n va! Lo campion Carcassona al tèrme d’una partida sens floretas pleguèt aqueste dimenge del costat de Workington Town: 24-16; demai, son segonda linha Anderson i agantèt un carton roge.
 
Per contra, Tolosa serà dels 16n de finala dins una quinzenada aprèp la victòria aisida de dissabte amb 10 ensags a la clau a Swinton: 56-18.
 
Los Dracs Catalans son en pana: a HullFC, èran a egalitat a la pausa 4-4 abans de daissar s’envolar los angleses: 28-8. E demòran en estagi en Anglatèrra per preparar lo rescontre de divendres a la nuèit cò de Sant-Helens (partida que se poirà seguir en dirècte sus BeinSpòrt).
 
Pel campionat d’Elèit, los pronostics que faguèrem sul debanament dels barratges son cambavirats en rason de la causida pianenca de dissabte. “Catalan burro” aquò se ditz plan en país d’Aude e los rosselhoneses an fait de l’ase lo simbòl de lor catalanitat. E plan fòrt sul sicut legendari, avèm l’ase de Pià, simbòl totemic de l’equipa de XIII. Fa quinze jorns los dirigents disián qu’èra complicat pels jogaires de Salanca d’èsser dins lo ritme amb un calendièr refofant de traucs gròsses coma de tutas per de ratasses e en rason de l’exclusion del club de la Copa Lord-Derby.
 
Dissabte, “logicament”, per la venguda d’Avinhon, decidiguèron de daissar los quadres en tribuna (çò que lor i farà una mesada sens jogar abans la mièja-finala del 28 d’abril: bonjorn lo ritme de la competicion!) e presentèron una equipa amb plan de juniòrs. Avinhon sautèt sus l’ofèrta per ganhar 36-12 e se plaçar en quatrena posicion al classament e doncas de recepcion de Tolosa pel barratge de la dimenjada.
 
Dimenge, Lesinhan en s’impausant larjament 56-22 fàcia a Vilanòva s’apoderava de la tresena plaça e reçauprà en barratge (aquò promet) lo vesin carcassonés.
 
A Sant Estève, Lescura d’Albigés acabèt son camin de crotz (una sola victòria acordada per la Federacion contra Montpelhièr per la Dimenjada magica de setembre) per una novèla desfacha fàcia als Dragonets: 42-10 Los Dragonets que son, coma lors vesins pianencs,dirèctament en mièja-finala.
 
Pels cadets de l’equipa de França, lo segond tèst fàcia als Youth England se soldèt dimars pasast pel revenge dels angleses: 42-16. De notar que dissabte, per la granda Potonejada pel catalan a Perpinhan, Lluís Colet parlarà pendent tretze oras de rugbi de XIII sus la Plaça de Verdun de 5 oras del matin a 6 oras del vèspre.




Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
3.

E Avinhon-Tolosa aqueste dissabte a 4 oras del vèspre (estadi Sant-Ruf)

  • 1
  • 0
Alan Roch Carcassona
2.

Lesinhan-Carcassona, dimenge 14 d'abril a 4 oras del vèspre sus l'estadi del Molin.

  • 3
  • 0
Alan Roch Carcassona
1.

En 16en de la Cup, lo 20 o lo 21 d'abril, los Dracs e lo Tolosa Olimpic aniràn en Anglatèrar desfisar daos equiaps del Championship : Hunslet-Dracs, York-TO.

  • 3
  • 0

Escriu un comentari sus aqueste article