Existís una brava diferéncia de nivèl entre la Super-Liga e l’estatge inferior, lo Championship. Atal, pels 1/8n de la Cup, los Dracs an pres lèu-fait la mesura de las Aglas de Sheffield 26-0 a la pausa; 68-6 a la fin: dotze ensags marcats amb lo còp de capèl per l’alièr de Corbièras, Damian Cardace.

De qué emmagazinar fisança e se metre suls bons ralhs abans la venguda del cap-de-fila actual de la Super-Liga: Huddersfield, aqueste dissabte 5 a 6 e mièja del vèspre a Brutús.

Dissabte, se joguèron tanben los barratges d’Elita que soriguèron als recebeires. Al Molin, Tolosa marquèt lo primièr ensag mas una combinason darrièr lo tengut amb lo talonaire Kane Bentley mandava lo centre de Lesinhan Florian Quintilhà puntar l’ensag. Aprèp, la carnièra verda e blanca mandava dos còps lo emsclanha Wynn darrèr la linha blanca: 18-4 pels campions a la pausa que daissèron puèi venir una equipa de Tolosa empruntada en manca d’inspiracion e de circulacion de la pauma. Los Blaus acabèron per encaissar encara dos ensags. Atal, sus la marca de 28 a 4, Lesinhan se trapa en mièja-finala.

A Avinhon, los Dragonets arribavan fòrts de las doas victòrias dins la sason. La partida foguèt equilibrada dins lo primièr tèrme. Avinhon menava 12-8. Los Dracs egalizèron a la represa per l’insasissable Escarré, mas a l’ora de jòc, los Sang e Aur pleguèron botica : 36-12 per Avinhon. Una qualificacion dels Provençals que marca lor retorn al cap del moviment tretzista e lo trabalh de relança del club entreprés.

Las doas mièja-finalas se tendràn dissabte a Tolosa (estadi dels Minimes): a cinc oras, rescontre entre Carcassona e Avinhon e a sèt oras, Lesinhan tornarà trapar sus sa rota los Catalans de Pià que los venon d’escartar de la Copa. Aquò promet; Pià sembla mai fòrt que Lesinhan; en contra, entre caracssona e Avinhon s’anóncia sarrat-sarrat. En juniòrs, las mièja-finalas se debanaràn dimenge de vèspre sus l’estadi Mazicou d’Albi, los quatre meteisses clubs mas dins una autra configuracion.

D’una part, a doas oras, Lesinhan contra Avinhon, puèi a quatre oras: Carcassona contra Pià. Las finalas Elita e juniòrs se debanaràn dissabte 12 de vèspre a l’Egassieral a Narbona.

Suls Dracs, de legir aqueste blòg, e de consultar lor sit.


Alan Roch