Bandièra01 1180x150: Comuna de Tolosa

Actualitats

Tèsta a tèsta d'Hollande e Sarkozy



Marine Le Pen a balhat libertat de vòte als simpatizants del Front Nacional a las presidencialas francesas e diguèt qu'ela votarà blanc



| Vilaweb

Lo segond torn de las presidencialas francesas se debanarà dimenge. A l'ora d'ara los sondatges son favorables al socialista François Hollande. Los documents que Muammar el Qadhdhafi aviá balhat cinquanta milions d'èuros a la campanha de Sarkozy de 2007 e la libertat de vòte que Marine Le Pen balhèt als sieus simpatizants, fan qu'aquel debat tèsta a tèsta siá la darrièra escasença per Sarkozy de capvirar los sondatges. Lo candidat-president a besonh dels vòtes del Front Nacional, e es per aquò que lo discors de la drecha francesa es vengut talament radical.



A nòu oras del ser se debanarà lo debat tèsta a tèsta entre los dos candidats. L'emetràn en dirècte TF1, France 2, BFMTV e i>TÉLÉ. Lo guidaràn dos grands de la television francesa, Laurence Ferrari, presentairitz de las nòvas del ser a TF1, e David Pujadas, un catalan que dempuèi 2001 presenta las nòvas de la nuèch a France 2. 

 

Sarkozy, conscient de l'avantatge qu'a davant las camèras, aviá demandat tres debats entre los dos torns, mas Hollande n'a acceptat sonque un. Lo president sortint, doncas, deu aprofechar la soleta oportunitat mediatica de capvirar los sondatges, sustot après lo revira-vai-te'n que recebèt de Marine Le Pen. 
 


En efièch, la dirigenta del partit ultradrechan anoncièt libertat de vòte pels sieus partidaris e diguèt qu'ela votariá blanc. Le Pen, tresena fòrça al primièr torn, amb de resultats melhors que jamai dins unas presidencialas, aviá dich que diriá pas res sus François Hollande e Nicolas Sarkozy fins lo 1 de mai, dins l'encastre de l'omenatge tradicional del sieu partit a Joana d'Arc.
 


Fin finala, en un discors als sieus simpatizants, dins la plaça de l'Opèra de París, Marine Le Pen se definiguèt per cap de candidat: "Que cadun faga la siá eleccion. Sètz de ciutadans liures e votaretz cossent damb la vòstra consciéncia, liurament... ieu personalament, m'aluenharai d'aquel miratge. Se pòt pas esperar res de l'UMP". E apondèt que votariá pas Hollande, la "falsa esperança", e tanpauc Sarkozy, la "nòva decepcion": "Dimenge votarai blanc; e en junh, blau marin [FN]", en referéncia a las eleccions legislativas del 10 de junh.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article