D’atemptats amb d’explosius e de mòrts n’i a gaireben cada jorn. Mas totes los mèdias son estonats quand aqueles malastres an luòc en Occident.
 
Es lo cas dels Estats Units ont, encara amb la psicòsi de l’atemptat de Boston, venon de patir l’explosion d’un sit de fertilizants a West, près de Waco, en Tèxas. Ça que la, aqueste còp tot fa pensar que s’agís d’un accident.
 
Segon las darrièras informacions i a 35 mòrts confirmadas e mai de cent cinquanta ferits, mas los mèdias locals parlan de seissanta o setanta mòrts.
 
Demest los mòrts i a sièis pompièrs, dos mètges d’emergéncias e un policièr. L’explosion a destruit qualques bastissas dont una escòla e una residéncia del tresen atge.
 
L’explosion s’es produsida a West, una vila d’aperaquí 2700 abitants e a qualques 130 quilomètres al sud de Dallas e 32 quilomètres al nòrd de Waco. “Sembla una zòna de guèrra tota plena de demolicions”, çò disiá Parnell McNamara, un uissièr del comtat de McLennan.
 
Coma se pòt veire sus aqueste vidèo enregistrat per una familha quand anavan en veitura, l’explosion es estada precedida per un incendi al sit:

 


 
Vaicí un autre enregistrament que permet de veire l’enòrma explosion:
 



Justament uèi, fa vint ans que se passèt lo masèl de Waco. Aquel jorn s’acabèt lo sètge de cinquanta un jorns del ranch ont se fortifiquèt lo cap de la sècta dels davidians de la Glèisa Adventista del Seten Jorn, David Koresh, e sos seguidors. I aguèt ochanta doas personas mòrtas.