Bandièra01 1180x150: Comuna de Tolosa

Actualitats

Alidé Sans, Crazy Álvarez e Eric Fraj au licèu

Les cantaires passèn un moment de convivéncia dambe les liceans de l’Isla de Baish

Alidé Sans e Crazy Álvarez
Alidé Sans e Crazy Álvarez
Le licèu Josèp Savèrna, de l’Isla de Baish (Savés), a la particularitat d’estar un deus licèus qu’arcuèlh le mès d’escolans d’occitan de las acadèmias de l’Oèst occitan dambe 75 escolans. Les escolans de prumèra e de terminala que rescontrèn aus artistas araneses Alidé Sans, Crazy Álvarez e au murethin Eric Fraj. Les de segonda, praubes eras, èran damorats a hèr un díver de matematicas! Aquò se passèc le divendres 19 d’abriu, de 13h30 a 15h30.
 
Estoc una ocasion originala de pausar questions, en occitan, aus autors deus tèxtes vistes en classa. Çampar, estoc pas agit de començar a pausar questions. Mès pauc a pauc, les escolans gausèn e aqueres tres artistas, de carn e òsses, toquèn les joens presents.
 
Pèi estoc le moment de cantar, Alidé Sans mostrèc un carisme, un entosiasme comunicatiu deu joenèr. Dambe ua votz de las polidas, Alidé cantèc Ath delà de tu, Sò jo en tot hèr participar les escolans. Enfin hascoc ua cançon entrainanta dambe Recuelh era mia sang. Tots vejón qu’Alidé a tot entà estar ua gran artista en tot aver 20 ans.
 
Après estoc Eric Fraj, dont l’experiéncia e le talent son pas de provar, que les cantèc Marinièr e le Fraisse.
 
Dambe la collaboracion d’Alidé, le joen cantaire de hip hòp aranés Crazy Álvarez hascoc duas cançons dins un estille mès reservat mès soent dambe un sens de la poesia.
 
Un còp las cançons acabadas, totas en occitan, les escolans avèvan hèit un vrespalh dambe pescajons. Quauqu’uns se podèvan pas empachar de demandar d’autografes aus tres artistas e un terminala de prénguer la guitarra de l’Alidé ende musiquejar un mòrs. Vertat ei qu’au delà deu simple rescontre dins un licèu, ua emocion passèc tant le moment viscut èra qualitadós.
 
 
 
 
Nicolau Rei Bèthvéder

 
_____


Recuelh era mia sang (Alidé Sans)


 


Sò jo (Alidé Sans)




Ath delà de tu (Alidé Sans)




Dera evolucion ara revolucion (Crazy Álvarez e Alidé Sans)
 


 
Marinièr (Eric Fraj)
 

 

Fraisse (Eric Fraj)
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
1.

Òsca als cantaires! Òsca als professors d'occitan que se bolègan coma NRB!

  • 10
  • 0

Escriu un comentari sus aqueste article