Actualitats
De milièrs de personas an demandat l’autonomia de Cabilia dins las manifestacions del 20 d’abril
An detenguts divèrses dirigents amazighs (berbèrs) a la fin de las protèstas, dont lo conselhièr regional de Ròse-Aups, Belkacem Lounès
Lo Movement per l’Autonomia de Cabilia (MAK) a mobilizat l’autonomisme dins tres vilas del país e dins la diaspòra. Lo partit reclama la democratizacion e la descentralizacion d’Argeria. An detenguts divèrses dirigents amazighs a la fin de las mobilizacions.
De milièrs de cabils an manifestat per l’autonomia de Cabilia amb lo motiu de las celebracions del 20 d’abril, commemoracion de la Prima Amazigh (o Prima Berbèra). Las marchas se son acabadas amb divèrsas personas detengudas per las fòrças de seguretat argerianas. Per las carrièras de la capitala cabila, Tizi Wezzu (Tizi Ouzou), an desfilat de grops d’estudiants al costat del Movement per l’Autonomia de Cabilia (MAK, segon la sigla en francés) e dels amazighistas del Rassemblament per la Cultura e la Democracia (RCD), çò explicava lo jornal Le Soir.
Lo MAK, de son costat, se congosta d’aver capitat d’organizar de manifestacions autonomistas non solament a Tizi Wezzu, mas tanben a Bogia (Bgayet, Bejaia), a Tubiret (Bouira) e dins divèrsas vilas de la rèsta del Mond ont i a la diaspòra cabila. Dins un d’aqueles actes, lo de París, lo president del govèrn cabil en exili, Ferhat Mehenni (restacat al MAK), diguèt que dins los meses venents prepausarà una constitucion per Cabilia.
Lo partit autonomista considèra que lo pòble cabil a drech de s’autogovernar mejançant un estatut d’autonomia dins una Argeria fòrtament descentralizada, democratica e que reconesca l’identitat amazigh d’una part importanta de sa populacion. Lo partit considèra tanben que cal dotar Cabilia d’un estat pròpri.
De detencions e d’interrogatòris
Après las mobilizacions del 20 d’abril, las fòrças de seguretat argerianas an arrestat divèrsas personas que i avián participat. Demest los dentenguts, cal remarcar Khaled Zirari, membre marroquin del Congrès Mondial Amazigh (CMA), que s’èra sarrat de Cabilia per prene part a las manifestacions. Segon çò que rapòrta en detalh l’agéncia cabila Siwel, Zirari a explicat que los servicis secrets argerians l’an interrogat pendent 14 oras e li an exigit de detalhs sus la collaboracion entre lo CMA, lo MAK e lo govèrn cabil en exili. Son estats tanben detenguts de membres argerians del CMA, coma Rabah Issadi, e lo conselhièr regional de Ròse-Aups, Belkacem Lounès. A Tubiret, lo MAK a denonciat la detencion de 15 militants.
_____
Mai d’informacions: Nationalia, Siwel, kabyle.com
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Azul (Adishatz en cabilia)
Adishatz a tot lo poble Occitan, sieu un Amazigh. Mas no parli plan Occitan.
Je m'excuse de ne pouvoir m'exprimer en Occittan. Je suis un kabyle et ça fait 2 ans maintenant que je suis à Toulouse, je suis sous le charme de votre culture, vos coutumes, votre langue, le combat que vous menez.
Merci de votre soutien peuple Occitan. De la part d'un frère Amazigh.
Liberté pour nos peuples
Solidaritat aubé lo pòble amasig !
En luòc de faire lo colhon al Malí, que nos còsta e nos costarà car en dardenas e an vidas umanas, lo govèrn fariá mièlhs de sosténer los amazighs. Mas per França, es plan conegut, i a pas de berbèrs, i a que d'arabs.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari