Bandièra01 1180x150: Comuna de Tolosa

Actualitats

Rugbi XIII. Lo campion serà catalan

Pià contra los Dragonets (St-Estève/XIII Catalan), tala es l'aficha del campionat Elèit 2013
Pià contra los Dragonets (St-Estève/XIII Catalan), tala es l'aficha del campionat Elèit 2013
Dissabte de vèspre, se debanèron finalas sus l’estadi del Molin a Lesinhan. Sant-Laurenç de la Cabrerissa s’emportèt la Copa Falcou fàcia a Vilanòva de Menerbés: 36-24 alara que Vilagalhenc-Argon tornava en Cabardés amb la Copa Déjean aprèp una victòria sus Salses: 37-10.
 
D’aquel temps, a Albi, los juniòrs de l’ASCarcassona se qualificavan per la finala del campionat en ganhant de justessa fàcia als tolzans: 28-24. Rescontraràn l’esquipa dels Dragonets victorioses d’Avinhon: 42-26 (partida,a queste dimenge 5 de mai a 13h30 a Brutús).
 
A Brutús, los Dracs recebián los Gigants d’Huddersfield amb una equipa remaniada en causa de nafraduras. Los catalans menavan a la pausa 10-8, mas, coma contra Leeds, sapièron pas bonificar una superioritat numerica de mièja-ora per plegar fin finala 28-20 e rajustar a la tièra dels nafrats lo Jason Baitieri tocat al genolh (sason acabada per el). Sola bona novèla: lo Scott Dureau pòt reprene un entrainament normal e, se tot vira plan, se tornarà metre a l’òbra e a la manòbra sus la pelena a la debuta de l’estiu. Dissabte, novèl desplaçament malaisit en Anglatèrra del costat de Wakefield (18h45; retrasmés en dirècte sus BeinSport).
 
Dimenge, se debanavan sus l’estadi dels Minimes a Tolosa las 2 mièjas finalas del campionat Elèit. Tenguèron totas sas promessas en tèrme de jòc, d’engatjament e d’intensitat dramatica. Fàcia a Lesinhan, los Dragonets perdèron d’entrada l’arrièr Robin: dobla fractura òs de la camba/peronè. A la pausa , los Catalans menavan 12-6. Mas, aprèp una escapada de Benausse, los audencs egalizavan amb un ensag de Michau abans que Poggi marquèsse en cap de linha: 16-12 pels Verd e Blancs.. Sus la darrièra cadena catalana de la partida, lo pilar Scimone preniá la defensa de las Corbièras a contrapè per s’amorrar entre los pals. E a la darrièra segonda, sens trantolar, Barthau passava la tarnsformacion de la victòria catalana: 18-16.
 
Dins la segonda partida, Tolosa marquèt d’entrada per Mingà. Cada equipa causiguèt de temptar las penalitats: dins lo primièr temps, Gressèque ne passèt 2 per Pià e Coturièr 2 per Tolosa. A la 28a, aprèp un còp de pè a seguir, Cooper marquèt per Pià aprèp una recuperacion de la pauma fòra-jòc que los arbitres castiguèron pas. 10 pertot a la pausa. Kriouache èra al relai d’un pichon còp de pè a seguir de Kerralah per balhar l’avantage als tolzans. Lo TO mancava de prene una avantatge decisiu mas Kerralah èra tròp gormand, tròp personal, e vendemiava l’ocasion en aur massiu (amb jòias incrustadas): sus aquela accion, se manjava la fuèlha de match! Pià tornava mercé a un segond ensag de Cooper e preniá l’avantge a la 78a mercé a l’indefugible Gressèque. Mas a la darrièra segonda, sus una penalitat ensajada e ensacada dels 30 mètres dins lo canton, Coturièr arrancava lo dreit a las prolongacions. La mòrt subrana tombèt sus Tolosa: una penalitat de Gressèque toquèt los pals e Cooper aplatussèt l’ensag de la victòria: 26-22. Tolosa a proposat lo jòc mai dinamic, mai creatiu, mai espectacular de la vesprada, tanben lo mai romantic (un pauc tròp) mas una equipa pianenca al jòc triste coma una boneta de nuèit i opausèt la realitat e lo realisme del planchòt.
 
Las doas formacions catalanas se tornaràn trapar dimenge a Brutús (a 15h30; partida retrasmesa en dirècte per L’Équipe 21). Qual l’emportarà: la freda maquina dels ases de Salanca o la volontat e la nhaca dels Dragonets? Responsa a 5 oras del vèspre dimenge al pè del Castilhet…
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
2.

D'un costat, en roge, verd e blanc
Pià-Salanca-Mediterranèu
de l'autre
los Dragonets (equipa resèrva dels Dracs, ententa entre St-Estève XIII e lo XIII Cataan)

Per melhor comprene, se venes pas a Perponhan dimenge, difusion en dirècte sus L'Equipe 21 cap a 15 h.

  • 1
  • 0
Mathieu Castel Amians
1.

Gramaci per l'informacion, pasmens, lo profane que siau a pas ben capitat de comprene qualei èran leis equipas en juec, subretot lei catalanas ! : /

  • 2
  • 0

Escriu un comentari sus aqueste article