Gaireben quinze ans après l’intrada en vigor de l’èuro, e dins una importanta crisi de l’Eurozòna, la Banca Centrala Europèa (BCE) comencèt de distribuir dijòus passat la segonda sèria de bilhets. La nòva sèria, nomenada Euròpa, intrarà en circulacion pauc a cha pauc pendent los ans que venon e en òrdre ascendent: an començat amb los bilhets de cinc èuros e mai tard cambiaràn los de dètz, vint, cinquanta, cent, dos cents e cinc cents.
 
Lo 10 de genièr passat, lo president de la BCE, Mario Draghi, faguèt ja public al Musèu Arqueologic de Francfòrt (Alemanha) lo nòu bilhet de cinc èuros, qu’es lo resultat de las avançadas tecnologicas. Segon la BCE, lo nòu bilhet incorpora d’elements de seguretat nòus e melhorats.
 
La filigrana e l’olograma mòstran un retrach d’Euròpa, personatge de la mitologia grèga que balha son nom a la sèria novèla. Lo nombre qu’èra verd esmerauda càmbia sa color en blau encre e produsís un reflèxe metallic que se desplaça verticalament. Suls marges esquèrre e drech del bilhet, se pòt veire de linhas bracas en relèu que permeton de l’identificar amb mai de facilitat, mai que mai per las personas amb de dificultats de vision.
 
Inicialament, los bilhets de la primièra sèria circularàn en parallèl amb los nòus, mas amb lo temps se retiraràn de la circulacion e sonque los nòus auràn de valor.