Bandièra01 1180x150: País Invisible

Actualitats

crotz-tolosaCreated with Sketch.GasconhaBearnVath d'Aussau

Gost, un estat independent gascon als Pirenèus?

La republica de Gost
La republica de Gost | JMO
Gost es un vilatjòt pintoresc plaçat dins los Pirenèus, a gaireben mila mètres de nautada. Se tròba dins la municipalitat de Laruns, una petita vila bearnesa montanhòla de la val d’Aussau. Administrativament, Laruns es situat dins lo departament dels Pirenèus Atlantics, dins la region d’Aquitània. Gost es fòrça pròche l’estacion termala d’Aigas Caudas, un endrech toristic ja pendent lo sègle XX.
 
Tot aquò auriá una importància relativa o sens cap d’interès en defòra del domeni local, se foguèsse pas perque Gost es un estat independent. L’isolament de l’endrech a fach que, pendent de sègles, Gost foguèsse governat per un conselh d’ancians, entièrament alièn a la legalitat en vigor e al marge de quina nòrma extèrna que siá. Sembla que Gost foguèsse pas jamai annexat legalament, ni per França, nimai per Espanha qu’es al limit sud del vilatge. En consequéncia, fòrça personas de l’endrech considerèron que, davant la non-incorporacion, Gost demorava una sòrta de pichon estat independent.
 
Davant la difusion que prenguèt aquel cas d’independéncia pirenenca, Joseph-Henri-Joachim Lainé, que foguèt ministre de l’Interior entre 1816 e 1818, e president de la Cambra dels Deputats pendent la Restauracion, diguèt plan clar que “Gost es una Republica” e apondèt que son govèrn prendriá aquel cas “plan seriosament”. Lo govèrn de París faguèt pas grand causa per cambiar la situacion, e los aüroses abitants de Gost contunhèron de se governar eles meteisses, plan alonhats del centre politic de la Republica Francesa. En 1913, quitament una publicacion dels Estats Units afirmava que Gost èra un Estat independent e apondiá qu’èra mai ancian que Sant Marin.
 
Al delà de son independéncia reala o pas, lo fach es que Gost es un luòc amb fòrça estonaments. Per exemple, es conegut per èsser un endrech ont las gents vivon fòrça ans. Sembla qu’un vesin arribèsse de viure 123 ans. Sens dobte los aires de libertat li melhorèron fòrça la santat.

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Miquel Banyoles
1.

O_O Visca Gost!!!

  • 5
  • 0

Escriu un comentari sus aqueste article