Bandièra01 1180x150: Comuna de Tolosa

Actualitats

Lo nòu govèrn polinesian vòl estancar la demanda de descolonizacion après la victòria autonomista

Gaston Flosse es lo nòu president de la Polinesia Francesa
Gaston Flosse es lo nòu president de la Polinesia Francesa | Jérôme Gallecier

Gaston Flosse a atench la majoritat absoluda a las eleccions e a promés d’ensajar de retirar una resolucion que demanda a l’ÒNU d’inscriure la Polinesia Francesa dins la lista dels territòris non autonòms. L’independentista UPLD a patit una fòrta davalada, al mitan d’una crisi economica prigonda.


Lo nòu president de la Polinesia Francesa, Gaston Flosse, a demandat permission al president francés François Hollande per s’adreiçar oficialament a l’Assemblada Generala de las Nacions Unidas, per fin d’arrestar la demanda de descolonizacion que presentèt arunan lo fins ara president polinesian, Oscar Temaru. Es probable qu’aquò siá la primièra decision que prendrà la nòva Assemblada de Polinesia, renovelada après lo segond torn de las eleccions de dimenge, qu’an cambiat prigondament la correlacion de las fòrças.
 
Lo partit de Temaru, l’independentista Union per la Democracia (UPLD), a perdut lo poder en conservar sonque 11 dels 57 sètis de la cambra polinesiana. L’autonomista Tahoeraa Huiraatira, de Gaston Flosse, es lo grand ganhant dels comicis, en aténher 38 sètis, çò que li autreja una confortabla majoritat absoluda. Lo tresen partit amb representacion a l’Assemblada serà l’autonomista Ti’a Porinetia, amb 8 sètis.
 
Al primièr torn, debanat fa tres dimenges, se vegèt ja clar que los autonomistas atenherián una victòria plan confortabla davant la malescasuda dels independentistas.
 
Serà lo cinquen còp que Flosse serà president de Polinesia. Los jornals e los analistas locals son d’acòrdi per soslinhar que Temaru a pagat un prètz fòrça naut per la crisi economica prigonda que patís Polinesia, amb d’indèxes de caumatge fòrça nauts.
 
 
Non tornar far partida de la lista dels territòris non autonòms
 
Opausant a l’independéncia, Flosse demandarà a l’Assemblada Generala de las Nacions Unidas que prenga pas en consideracion la demanda de descolonizacion que presentèt Temaru l’an passat. Temaru voliá que Polinesia foguèsse reïnscricha dins la lista de las Nacions Unidas dels territòris non autonòms. Aital, çò pensa Temaru, seriá mai estat aisit de poder convocar un referendum d’independéncia en aquela dependéncia francesa.
 
Mas lo senator polinesian al Senat Francés, Richard Tuiheava, ditz que la demanda es ja dins l’agenda de l’ÒNU e que doncas, se pòt pas anullar. Encara mai, Tuiheava considèra que lo debat sus la demanda poiriá començar la setmana que ven e afirma que los polinesians independentistas an lo sosten de las poténcias regionalas, Austràlia e la Nòva Zelanda.
 
 
 
 
 

 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
7.

#6 La regression dels dreits socials en Espanha a pas res a veire amb las autonomias. Es lo PP (jacobin) de Madrid e tanben las comunitats governadas pel PP que degalha çò existent al nom del liberalisme destimborlat. Euskadi amb PSOE primièr puèi PNB fa çò que pòt per i escapar. Andalosia tanben. E Catalonha, encara que de centre dreit ara, es pas tan barbara que los luòcs ont malgoverna lo PP. Mas lo PP fa tot çò que pòt, e los mejans de l'estat son fòrça potents, per ofegar Catalonha. Se cal entresenhar abans de dire de contravertats.
Vos rementi que lo Chevènement, un estiu que i aguèt d'incendis grèus a Catalonha, diguèt qu'èra un efecte de las autonomias se los catalans deguèron demandar d'ajuda a França. Qualques meses mai tard, quand los franceses demandèron d'ajuda als catalans per atudar un incendi del costat nòstre, aquel sacamand demorèt mud. Aquò per los que innocents que se creson qu'al MDC son piòts mas onèstes. Son dels pus messorguièrs, que se sàpia!

  • 0
  • 0
La coupo pleno! un drin de provença aquest dia
6.

Tots la drèta e l'esquerra que van virar autonomista quan que poderam destrussar mei lo pòple. Qu'ei ua brincadèra l'autonomisma. Qu'ei odio lo FdG mès que devem veder que l'argumentaria de las destruccions deus drèts sociaus dens un pais dab autonomias a l'espanhòla per exemple que sera pira que adara. Qu'ei la pòrta obèrta a la fin deus dreits universaus. Jà que comença dab la crisi. Donc ne son pas estonar qu'aquest paubra merda colonialista com lo flosse seja adara un autonomista e perqué pas un dia independantista quan n'i aura pas mei polinèsian en polinèsia.
Tà jo dab la crisi finau de la nosta civilizacion capitalista lo unènc camion qu'ei la revolucion e la fin deu capitalisme. Mès parallèlament que deven combater per ganhar mès de dreits democraticas (per la lenga per exemple) e har avançar la consciencia. La reneishença d'occitània ne vienera pas d'en haut, la pròva totas las iniciativas depuish 40 ans que vieneran d'abaix.

Polinèsia independanta sonque!

  • 0
  • 0
Maime Limòtges
5.

#4 Me sembla que lo Gaston es totjorn estat autonomista (e gaullista). Mas me sembla qu'a totjorn 'gut 'na vision plan particuliera de l'automonia polinesiana : una automonia que li permetet de far ço que volia. Puei, dins lo contexte d'un TOM, èsser autonomista pusleu qu'independentista es logic per quauqu'un proche de l'UMP.

  • 2
  • 0
Mathieu Castel Amians
4.

#3 Diable ! M'èri demorat a Gaston Flosse a l'UMP. Sabiau pas qu'aqueu caluc èra devengut autonomista encuei !

  • 1
  • 0
Terric Lausa Quilhan
3.

#2

Lo títol ditz plan çò que se passèt: la victòria dels autonomistas del partit de gaston Flosse, lo Tahoeraa Huiratiraa.

Per contra los independentistas d'Oscar Temaru an perdut

  • 2
  • 0

Escriu un comentari sus aqueste article