Bandièra01 1180x150: Comuna de Tolosa

Actualitats

Los usatgièrs de la linha Pau-Auloron demandan un tren mai rapid

| CRELOC
Divèrsas associacions bearnesas d’usatgièrs del tren protèstan pel temps de trajècte entre Pau e Auloron, qu’es a l’ora d’ara de 38 minutas. Çò qu’èra una gara importanta dins una linha internacionala es vengut amb lo temps l’extrèm d’una petita linha que los trens i intran a 30 quilomètres ora. En mai d’aquò, en març, 40 ligasons foguèron suprimidas a causa de caumas o d’arbres sus la via.
 
Dimars passat, lo vicepresident de la region d’Aquitània en carga dels transpòrts, Bernard Uthurry, recebèt las associacions amb Philippe Cousinet, en nom de l’SNCF, e Phillippe Gauzence de Lastours, responsable d’RFF.
 
Dins l’amassada, Gauzence de Lastours afirmèt que lo tren poirà ganhar aperaquí 10 minutas sul trajècte en 2015. Pasmens las associacions d’usatgièrs sollicitèron tornarmai un crosament a Busi que permetriá de far circular dos trens a l’encòp, un dins cada sens.
 
A prepaus de la redobertura de la linha de Campfranc fins a Bedós, Gauzence de Lastours ditz que “cap de decision es pas estada presa a l’ora d’ara”
 
De son costat, lo president del Comitat per la Redobertura de la Linha Auloron-Campfranc (CRELAC) [“CRELOC” segon sa sigla en francés], assegura que “De còps los trens an de retard, mas arriban de lo recobrar. Aquò es ben la pròva que i a pas la volontat de far davalar lo temps de trajècte a 30 minutas!”

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

BOURDON Pau
2.

"Tot còp qu'un guit e trauquèva la via lo maquinista que s'estanquèva e que hasèva tringlar ua esquiròta": urosa epòca !

  • 1
  • 0
Joan-Ives G.
1.

Lo darrèr còp que prenoi aqueth trin qu'estó lhèu trente ans a. Tot còp qu'un guit e trauquèva la via lo maquinista que s'estanquèva e que hasèva tringlar ua esquiròta : ding ! ding… e arrés repoteguèvan pas. Ganhar dètz minutas, e s'ac vau tant qu'aquò ? B'ac caleré lhèu demandar aus guits. N'estant pas jo un usatjant regular, lo men avís n'ei pas de compta har.

  • 3
  • 0

Escriu un comentari sus aqueste article