Bandièra01 1180x150: Comuna de Tolosa

Actualitats

Chepic per una amassada nezonazi al sud d’Occitània

L’organizacion racista Hammerskins organiza una amassada aquesta dimenjada que ven, endacòm en Fenolhedés, en Corbièras o al nòrd de Catalonha

Los Hammerskins an coma basa ideologica la supremacia de la “raça blanca”. An una pensada dobertament nazi e an de ligams amb lo Ku Klux Klan
Los Hammerskins an coma basa ideologica la supremacia de la “raça blanca”. An una pensada dobertament nazi e an de ligams amb lo Ku Klux Klan | Fafwatch
L’organizacion Hammerskin Nation, fondada als Estats Units, a convocat per aquesta dimenjada que ven una concentracion d’encastre europèu endacòm al nòrd de Catalonha, en Fenolhedés o en Corbièras. S’agís d’una organizacion racista, violenta, autoritària e pro ben organizada que revendica Adolf Hitler e defend la raça dicha “ariana”. Las fòrças de seguretat dison que son en alèrta, segon çò que rapòrta lo jornal catalan La Clau. De son costat, lo blòg antifaissista Fafwatch mòstra son chepic per la pojada de l’extrèma drecha en Euròpa.
 
Lo luòc de l’amassada contunha d’èsser desconegut, mas an anonciat de navetas de l’aeropòrt de Perpinhan per çò que podèm creire que serà al nòrd de Catalonha, en Fenolhedés o en Corbièras, ont los participants auràn un servici de lotjament e restauracion. Podèm preveire que serà un luòc pro amagat per poder menar a tèrme las practicas de tir, un dels programas d’aquelas amassadas, ja que los Hammerskins son afogats de las armas. Se sap pas qual serà lo nombre de participants: en novembre de 2012 s’amassèron a Toul (Lorena) aperaquí 2000 neofaissistas violents.
 
An tanplan anonciat per dissabte de ser un concèrt de grops classics del repertòri de RAC o rock nazi, amb las bandas Frakass d’Arpitània, Bordel Boys de Bretanha, Hold Fast de Provença e Más Que Palabras de Castelha.
 
Los Hammerskins son un grop fondat a Dallas (Estats Units), en 1988, e an coma basa ideologica la supremacia de la “raça blanca”. An una pensada dobèrtament nazi e an de ligams amb lo Ku Klux Klan. Presican la violéncia e organizan d’eveniments amb un caractèr racista marcat, en emplegar de simbòls hitlerians.
 
Segon La Clau, se calcula qu’an aperaquí 100 000 sòcis en Euròpa e als Estats Units. Lor seccion francesa es susvelhada per la Direccion Centrala d’Intelligéncia Interiora de l’estat francés (DCRI).

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Peirasson
1.

Viètd'ase un regiment pels fats a Bugarach per la famosa fin dal monde, e pas res per empachar aiçò ? I a quicòm que truca aquí ? Som malcorat...

  • 2
  • 0

Escriu un comentari sus aqueste article