Bandièra01 1180x150: Comuna de Tolosa

Actualitats

Es mòrt lo dictator argentin Jorge Rafael Videla

Es mòrt dins la preson ont complissiá la condemnacion a perpetuitat pels crimes comeses pendent la dictatura entre 1976 e 1981

L’èx-dictator argentin Jorge Rafael Videla es mòrt dins sos 87 ans, segon çò qu’an raportat qualques mèdias locals. Videla presidiguèt la darrièra dictatura militara argentina e es mòrt dins la preson de Marcos Paz, ont complissiá la condemnacion a perpetuitat pels crimes comeses pendent lo sieu mandat.


Participèt al còp d’Estat que revirèt lo govèrn de María Estela Martínez de Perón, lo 24 de març de 1976, e qu’instaurèt una dictatura militara en fasent desaparéisser 30 000 personas.
 
Videla foguèt condemnat pel primièr còp a perpetuitat en 1985, mas en 1990 lo govèrn de Carlos Menem lo gracièt. Dètz ans puèi, lo govèrn de Kirchner declarèt inconstitucionalas las gràcias de Menem. En 2003 lo tribunal de Nurembèrg demandèt, sens capitar, son extradicion en Alemanha per l’assassinat d’una ciutadana alemanda en Argentina en 1977. Mai tard, en 2008, perdèt lo benefici de la detencion domiciliària. En 2010, la Cort Suprèma resolguèt que la gràcia de Menem èra pas constitucionala e que caliá complir la condemnacion anullada. Aquel meteis an, foguèt condemnat a perpetuitat coma presonièr comun per de delictes contra l’umanitat.
 
Foguèt tanben condemnat a cinquanta ans de preson pel raubatòri d’enfantons pendent lo sieu mandat en la dictatura. La pena foguèt dictada pel Tribunal Federal e s’apondiá a d’autras condemnacions precedentas. Lo procès metèt en examen 35 cases d’apropriacion d’enfants nascuts en captivitat.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

ltrobat
4.

Puish a que l'ironia deu men purmèr comentari n'èra pas compresa (e lo comentari tirat deu siti...), que diserí lo problèma n'ei pas Videla que sia mort mes sustot qu'aja viscut...

  • 0
  • 0
Terric Lausa Quilhan
3.

Coma Robèrt trapi qu'es rassegurant de saber que de còps que i a , unes dictators se morisson en preson

  • 2
  • 0
manjacostel Mureth
2.

Levat lo temps tot va plan , aprèp Tatcher l'amiga de Pinochet, Videla....
Question es que van l'escampar d'avion per veire se vòla , que ne faguèt escampar un fum de paures bogres , per l'escòla de tortura de la marina , i son pas arribat a volar, elses....E tornaràn pas...
Mas que los crancs n'en voldriàn pas de Videla ...
Que se tròben en infèrn totes per dansar la valsa eterna òs contra òs, cais contra cais...


  • 4
  • 0
Robèrt Lauragués
1.

Òsca! Fin finala un dictator que morís en preson!

Cal remembrar qu'es l'estat francés que l'ensenhèt las torturas qu'a emplegadas aquel tipe

http://www.japantimes.co.jp/opinion/2009/05/11/commentary/french-role-in-the-export-of-torture-practices/#.UZdkCILpAsA

  • 4
  • 0

Escriu un comentari sus aqueste article