La formacion independentista còrsa Corsica Libera anóncia que vòl estonar a las legislativas francesas del 10 e del 17 de junh. Son conscients que partisson d'una experiéncia negativa: los resultats del primièr torn de las presidencialas son pas gaire bendisents, vist que la candidata qu'avián sostenguda, Eva Joly, a atengut solament 2,23% dels vòtes dins la circonscripcion de Corsega del Sud, e 2,33% dins la de la Nauta Corsega. 

 

Ça que la, los dirigents de Corsica Libera pensan que las legislativas son pas la meteissa causa. Sustot perque i pòdon presentar los lors candidats e n'especificar las lors tòcas. La corsa electorala a començat pels independentistas, que lo 30 d'abril presentavan a Corti los sieus candidats —totes venent de l'anciana Corsica Nazione— e indicavan las grandas linhas de çò que serà la lor campanha. Per desfar de malentenduts, los dirigents justifican que, contràriament a çò qu'avián decidit en d'autras eleccions del passat, son ara dispausats a far front. Las circonstàncias actualas marcadas per la crisi dins totes los encastres lor aconselhan, çò dison, de portar a la palèstra francesa las lors revendicacions. La tòca es d’aténher almens 10% dels vòtes, una fita atenguda a las eleccions a l'Assemblada de Corsega, çò que lor donèt de representacion dirècta e separada dels autonomistas. 

 

 

Corsica Libera assegura que desvoloparà "de tèmas restacats als ciutadans". En metent en plaça una "ciutadanitat còrsa, fondada sus dètz ans de residéncia permanenta", se poirà garentir l'accès priviliegiat a la proprietat e a l'emplec dels ciutadans còrses. Los autres aspèctes fondamentals son "l'evolucion institucionala, la sortida de la crisi e la mesa en libertat de totes los presonièrs politics". Corsica Libera considèra qu'aquò passa per la sobeiranetat politica, perque "sens ela i a pas de futur". 

 

Lo partit independentista admet que "lo combat electoral" serà malaisit. Pas solament perque i concorron los partits de tradicion francesa, mas tanben pel nacionalisme còrs autonomista agropat dins la candidatura Femu a Corsica, que presentarà de noms plan coneguts dins l'illa, coma Jean-Christophe Angelini o Gilles Simeoni. Angelini, de fach, atenguèt un resultat remarcable dins las eleccions de fa cinc ans, quand arribèt quasi a 15% dels vòtes dins la siá circonscripcion de la Corsega del Sud. 

 

Corsica Libera ara vòl jogar un ròtle tan notable coma aquel dels autonomistas fa cinc ans e, e mai en soslinhar que lo sistèma politic en Corsega es "plan subvencionat, perniciós e clientelista", lo partit pensa que farà un bon primièr torn per "mandar un senhal plan fòrt a París" e donar "un passatge suplementari" per articular una "solucion negociada entre Corsega, lo sieu pòble, los sieus elegits, e l'Estat francés".