Bandièra01 1180x150: Comuna de Tolosa

Actualitats

De susmautas entre d’ultras e la polícia après l’assassinat d’un soldat a Londres

De militants de l’ultradrecha britanica se son afrontats als policièrs a Woolwich

Qualques oras après l’assassinat d’un soldat per carrièras a Woolwich, en un atac qualificat de terrorista, de desenats de seguidors del grop ultradrechan de la Liga de Defensa Anglesa (English Defence League, EDL) s’acampèron sul luòc dels faches e s’afrontèron amb la polícia, en una protèsta convocada pels rets socials. Los acampats lancèron de botelhas als policièrs mentre que cridavan d’eslogans antimusulmans, segon çò que dison los mèdias angleses. Un centenat de personas, dont qualques unas portavan de cagolas amb la sigla EDL, batalhèron pendent una ora amb la polícia.
 
“Còpan los caps dels nòstres soldats. Es aquò l’islam. Es çò qu’avèm vist uèi. An copat lo cap a un dels nòstres soldats dins las carrièras de Londres”, çò disiá Tommy Robinson, lo cap del grop EDL.
 
Los afrontaments entre los ultradrechans e la polícia a Woolwich s’alonguèron pendent fòrça temps.
 
La protèsta violenta de l’EDL se debana dins l’encastre d’una seguida de represalhas de grops extremistas contra la mòrt d’un soldat, dimècres passat, al sud-èst de Londres. En mai d’aquela protèsta violenta, la polícia a confirmat la detencion d’almens doas personas en Essex e Kent per aver atacat de mosquetas.
 
La comunautat musulmana del Reialme Unit a condemnat l’assassinat del soldat. S’agís d’un acte “entièrament barbar”, çò an dich los caps religioses del país, qu’an soslinhat qu’aquel atemptat a pas cap de basa sus l’islam e que lo rebutan sens cap de resèrva.
 
Lo primièr ministre britanic, David Cameron, condemnèt ièr l’assassinat del jove, comés amb de cotèls, e diguèt que se podiá agir d’un acte terrorista. La victima seriá, segon la premsa britanica, un soldat de la casèrna de Woolwich. Lo govèrn de Londres a convocat d’urgéncia una reünion del comitat de seguretat Còbra, que s’es acordat per aumentar la seguretat a Woolwich e dins d’autras zònas amb de casèrnas militaras.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article